Home Politics Parlamentario Endy Croes di MEP: CAFT ta faya barbaramente y no tin...

Parlamentario Endy Croes di MEP: CAFT ta faya barbaramente y no tin derecho di existencia

Parlamentario Endy Croes ta duna su opinion awe den un forma bastante skerpi. CAFT a bin Aruba momento cu Mike Eman a causa un desaster financiero, esta na momento cu e deficit a alcansa 9.3% na 2014 cual ta un buraco di mas di 400 MIYON florin den nos presupuesto 2014. Den cuadro di esaki y bou hopi presion di Hulanda gobernador a keda sin firma e presupuesto 2014 y a manda CFT (di Corsou) Aruba pa un inventarisacion. Despues di esaki Hulanda a keda pone presion unda Mike Eman a dobla rabo y a firma un protocol dia 2 di Mei 2015 cual a duna bida na CAFT.

Entrega autonomia financiero
Despues di e protocol aki, pa ta exacto 27 di Augustus 2015, Parlamentarionan di AVP a bulldoze parlamento y a vota VOOR pa e ley di LAFT. Den e ley di LAFT tin normanan stipula den artikel 14 Lid 2. CAFT a bin pa monitor gobierno pa asina trece un balance pa un presupuesto duradero pa Aruba. Akinan Mike Eman y Parlamentarionan di AVP a entrega parti di nos autonomia financiero y a causa un “scheur” den nos Status Aparte. Normanan ancra den ley ta papia di un deficit di 3.7% (2015), 2.0% (2016), 0,5% (2017) y un surplus di minimo 0.5% (2018). Resultado ta cu Mike Eman a sigui malgasta placa den cara di CAFT y a bende edificionan pa alcansa su norma y despues a ricibi kwijtschelding di 60 MIYON florin di SVB pa asina usa maniobranan incidentalmente pa cera presupuestonan di 2015 y 2016. Sinembargo den 2017 Mike Eman a bin cu e storia cu gobierno lo ricibi 73 MIYON florin di CITGO cual nunca a yega su destino completo.

Mester doek op CAft
Riba dje Mike Eman a hinca alrededor di 130 MIYON florin den campaña y nunca por a cumpli cu e norma di un deficit di 0.5% pa cu 2017 cual ta alrededor di -25 Miyon florin. Momento cu Coalicion a tuma over 17 di November 2017 a encontra nan mes cu e sorpresa desagradabel aki. Tur esaki a pasa cu bendicion di CAFT. Pues si awe Hulanda mediante CAFT kier bin presiona gobierno pa “mata” nos pueblo pero basta nos corigi e desaster di AVP y CAFT den 2 of 3 aña, Hulanda ta bon equiboca. Como miembro di parlamento esaki ta un insulto pami y sigur un bofta di e macambanan pa cu nos Pueblo. Hamas y nunca mi lo acepta esaki y publicamente mi kier duna mi opinion. CAFT pami por wel di baha na awa! Nan ta co responsabel pa e desaster. Aruba lo bini cu su propio Begrotingskamer y lo mester doek op CAFT. Nos lo keda trata otro cu respet y nos mes lo percura pa drecha nos situacion y sin ningun presion di CAFT of Hulanda.