Parlamentario Endy Croes ta ilustra cu segun informenan e caso penal di ex-Minister di AVP, Paul Croes lo ta den corte durante e dianan 23, 24, 25 di Mei proximo. Nos tur por corda ainda cu despues di un investigacion profundo haci door di Ministerio Publico, Landsrecherche (LR) y Cuerpo Policial di Aruba pa un tempo bastante largo alrespecto di posibel ‘ambtelijke omkoping’, dia 21 di Augustus 2017 a bay over na detene e tempo aya Minister di AVP Paul Croes. E investigacion aki tin e nomber di “IBIS.”
Soborno y labamento di placa
E presunto corupcion aki ta encera primordialmente cu e Minister di Labor di AVP tabata pidi y/of tuma placa di soborno en cambio di un exencion (ontheffing) di toets di arbeidsmarkt. Un arbeidsmarkttoets positivo di parti di DPL (Departamento di Progreso Laboral) of un ontheffing di esaki ta un condicion pa DIMAS saca un permiso di trabao na Aruba. E ontheffingnan tabata wordo saca door di e minister, den mayoria di e casonan, despues cu DPL a duna conseho negativo. Cu e ontheffing aki, stranheronan tabata por a haya permiso di trabao. Segun Ministerio Publico cu durante e investigacion a lanta ademas e sospecho cu e minister a haci su mes entre otro, culpabel na labamento di placa, ‘ambtsmisbruik’ y pone hende na trabao ilegalmente. Condenabel ta sigur e echo cu e Minister di AVP aki posiblemente a enrikece su mes perhudicando miles di Arubiano y stranheronan cu ta na Aruba cu tin nan permiso pero door di e negoshi miyonario a opta pa duna miles di permiso na un manera ilegal strobando tur esnan cu tabata inscribi pa un trabao na DPL di por a haya un trabao y gana un pida pan honradamente. Esaki a conduci tambe na un desempleo enorme actualmente na Aruba.
Un caso hopi grave
Desde Maart 2017 un total di 30 testigo y 21 sospechoso a wordo scucha y interoga di cual tambe e ex-Minister di Labor di AVP. Pa prome biaha den historia ta drenta un cas di un mandatario, esta un Minister di AVP den funcion y ta bay over na detene e Minister. Segun Ministerio Publico tanto Landsrecherche, RST y Polis a traha masha duro pa entre otro inventarisacion di portadornan digital cu a wordo tuma den beslag manera computers, celular etc. Tempo cu Minister di AVP a wordo deteni el a wordo poni den ‘beperking’, kiermen cu e no por a ricibi ningun bishita cu excepcion di su abogado. Pues ta trata di un caso di un gravedad hopi halto. Tur cu tur ta papia di alrededor 2000 ontheffing na balor di entre 2500 pa 5000 florin pa cada ontheffing.
Cambio den ley di integridad
Ademas di esaki AVP a stroba cu nan maneho coruptivo aki alrededor di 2000 persona di Aruba of cu ta na Aruba caba di haya un trabao. Awe e Coalicion nobo aki ta sinta cu e batata unda miles di ciudadano ta rogando pa un trabao. E caso IBIS ta un “highprofile case” y ta un caso cu henter comunidad lo bay sigui cu hopi atencion. Ta prohibi pa lubida con parlamentarionan di “panlefi” di AVP a haci cambionan den e Ley di integridad cual Marlon Sneek a presenta pa asina acomoda ex-Minister di Labor Paul Croes pa e por a keda cobra 100% di salario di minister siendo cu e ta cera den KIA. Tur esaki cu consentimento di nan lider Mike Eman. Algo nunca bisto. Esaki ta solamente pa ilustra con e mente maligno di AVP ta funciona. Esaki ta inicio di un di e casonan cu a yega asina leu y sigur tin mas minister cu lo wordo investiga unda pronto nos lo tende di mas casonan contra ex-Ministernan corupto di AVP. Mentalidadnan diabolico manera di AVP hamas por wordo permiti pa regresa na poder.