Home Politics PROME MINISTER TA REUNI CU MANDATARIONAN DI COLOMBIA Y PANAMA A haci...

PROME MINISTER TA REUNI CU MANDATARIONAN DI COLOMBIA Y PANAMA A haci palabracionnan cu ta bay yuda nos den algun reto grandi cu nos tin nos dilanti

Durante su biahe na Costa Rica, Prome Minister a reuni cu mandatarionan di varios pais kendenan a asisti na e trasapso di mando y inauguracion di President Nobo na Costa Rica. Entre otro nos Premier a reuni cu President di Panama señor Juan Carlos Varela y cu Vice President di Colombia señor Oscar Naranjo.

A toca varios tema di interes comun entre otro economia, turismo y principalmente e tema en comun cu tin tur tres pais mas preocupa cua ta e tema di e situacion na Venezuela.

Ambos pais ta experencia tambe cu tin hopi Venezolano cu ta sali for di nan pais y bay Colombia y Panama. Cada un a atende cu esaki na un forma diferente. Panama a introduci un visa. A traves di e visa obligatorio aki nan ta midi e cantidad di persona cu nan ta laga drenta legalmente cu un visa. Sinembargo, nan a realisa cu mas hende ta drenta na forma ilegal mustrando cu no necesariamente un visa ta soluciona e problema.

Di su banda, Colombia ta procede di un otro forma. E ta ricibi tur esnan cu ta sali for di Venezuela saliendo di e punto cu ta pais ruman cu lasonan di hermandad di hopi aña. Sinembargo Colombia no ta duna esnan cu sali di Venezuela un status di refugiado pasobra e ora a base di tratadonan internacionl lo pone un peso financiero hopi grandi riba e pais. Pa cua motibo Colombia a prefera di duna nan permiso di estadia pa asina nan bay traha cu lo no pisa tanto riba e pais.

Prome Minister Evelyn Wever-Croes a indica cu e manera cu Colombia a atende cu e situacion, lo ta hopi dificil pa Aruba haci mirando cu nos ta un pais hopi chikito por lo tanto no por permiti di duna permiso na tur esnan cu drenta. Sinembargo, a yega na palabracionnan cu ambos pais pa comparti experencia cu otro y siña di otro y aplica loke cu por wordo aplica dentro di loke cu por. Aunke Aruba no por haci loke Colombia y Panama ta haciendo, tin otro cosnan cu nos por haci en comun.

Premier Wever-Croes a enfatisa cu ta importante cu ambos pais a realisa y comprende, despues di a papia di e tema y cu e mandatario a splica cu Aruba ta un isla cu apenas 110 mil habitante, y si tin 10 mil persona cu status ilegal, esaki ta 10 porciento di e comunidad.

E Premier di Aruba ta bisa cu di parti di Colombia ya caba a haya señalnan cu nan tin e tema aki hopi na serio. Y nan ta mira tambe cu nan responsabilidadnan no ta solamente nan pais ni tampoco yuda solamente e Venezolanonan cu ta sali di Venezuela bay Colombia, sino nan ta sinti tambe e nesecidad pa tin mas trankilidad den region y cu nan mester saca un man pa yuda Aruba.

“Mi a parecia esaki masha hopi mes pasobra mi no a spera cu ayudo lo yega di e banda ey. Den e siguiente dianan lo nos sigui concretisa naturalmente e tema aki pa sa con nan por yuda nos den e situacion aki”.

Cu Vice Presidente di Colombia, señor Naranjo, Prome Minister a tuma e oportunidad pa trata e tema di nos hobennan cu ta studiando medicina den nos region. E problema no ta solamente Costa Rica sino Colombia tambe. Y Prome Minister a dun’e di conoce cu e mandatario di Salubridad, Minister Dangui Oduber ya caba ta hopi avansa cu e proceso aki. Vice President di Colombia a duna su compromiso cu nan lo asisti den esaki tambe.

“Mi ta weita atras riba un experencia hopi grandi y unico pero specialmente mi ta weita atras riba palabracionnan cu ta bay yuda nos den algun reto grandi cu nos tin nos dilanti”, Prome Minister a expresa.