Home » Parlamentario drs Mervin Wyatt Ras: Elogio y reconocimento na tur cu ta traha den e mundo di enfermeria

Parlamentario drs Mervin Wyatt Ras: Elogio y reconocimento na tur cu ta traha den e mundo di enfermeria

by Admin
0 comment 65 views

Miembro di fraccion di AVP den Parlamento, drs Mervin Wyatt-Ras durante conferencia di prensa di fraccion di AVP a duna atencion na siman di enfermeria, ya cu dia 12 di Mei proximo ta Dia di Enfermeria.
Wyatt-Ras, ex-Presidente di e comision di Salubridad di Parlamento, ta desea tur esunnan cu ta traha den enfermeria na Aruba un feliz siman di celebracion y ta gradici nan pa e trabou bunita cu ta ser haci pa nos pashentnan.
Nos tur ta bira pashent un dia y ta importante ora nos ta malo y nos ta sinti nos mes vulnerabel, nos tin esunnan profesional pa duna bon cuido. Wyatt-Ras ta kere cu e ta un trabou valioso, un trabou cu hopi di esunnan den enfermeria ta haci di curason y cu dedicacion.
E trabou di cuido aki ta dia pa dia mas esencial. Sigur mirando cu nos comunidad ta enveheciendo y tin hopi mas malesanan cronico. E cuido aki no solamente ta limita na e cuido den hospital pero tambe na cas, na oficina di dokternan etc. Por ehempel gobierno di AVP a emplea ‘praktijk ondersteuners’ pa yuda dokternan di cas atende pashentnan y di e forma aki atende cu malesanan, manera diabetes y presion halto pa evita cu e malesanan aki ta empeora sin embargo, esaki no ta suficiente y mester continua. Un bon noticia cu nos a tuma nota di dje y a base di preguntanan cu nos fraccion a haci, gobierno lo continua cu e trend aki y lo sigui pone 20 ‘praktijk ondersteuners’ cerca dokternan di cas. Na un dado momento e peticion di pashentnan pa bay cerca un specialista lo baha pasobra nan lo wordo atendi mas lihe y efectivo cerca dokternan di cas y e ‘praktijk ondersteuners.’
Gobierno anterior igual cu e trend mundial a fortifica e ‘eerste lijns zorg’.
Alabes tin cu sigui amplia e cuido di pashentnan na cas, manera e.o. di nos grandinan. Ta importante pues pa gobierno actual continua pa amplia e cuido na cas, manera e.o. esun di Witgele Kruis. E wijkzorg tin su efecto preventivo tambe cerca nos muchanan chikito cu ta ser gescreend.
Na Hulanda caba diferente verpleger a discuti riba e punto aki y ta trahando ariba e ‘kwaliteitskader’ di e ‘wijkverpleging’ na unda ta traha mas riba e producto final, esta e resultado di tratamento en bes cu ariba produccion. Ademas ta yuda e pashent pa ta mas independiente y “Zelfredzaam”.
Na Aruba nos tin cu traha riba e mentalidad independiente di e pashent. Wyatt-Ras sa esaki di propio experencia cu cuido di su mayornan na cas.
Aunke cu ultimo tempo esunnan trahando den enfermeria ta bou di hopi presion y sa wordo cuestiona den diferente asunto pa motibo cu nos hendenan ta birando mas critico pa cu e trato medico, Wyatt-Ras ta kere cu gran mayoria ta haciendo un tremendo trabou y nos mester sigui sostene nan y percura pa nos hobennan bira interesa den e profesion bunita aki pa asina mañan nos tin hendenan mas hoben den enfermeria pa ora cu esunnan cu ta trahando awor aki retira, e trabou por wordo tuma over.
Un palabra di elogio na tur cu ta traha den e sector di enfermeria y tambe na tur cu ta duna sosten na cuido di pashentnan pasobra nos pashentnan mester keda semper na prome luga y nan derechonan mester salvaguardia,” Parlamentario Mervin Wyatt Ras a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio