ORANJESTAD -Señora Diana Antonette a celebra 50 aña cu un tremendo show di baile den Cas di Cultura.
Despues di a gradua como docente den ballet clasiko cu specialisacion den jazz-ballet y baile flamengo ela bolbe su isla natal y a traha como docente y bailarina profesional, cua e tin un carera hopi activo, creativo y exitoso specialmente riba e tereno di nos folklore caminda el a ricibi varios premiacionnan tanto local como internacional.
Despues di un bunita show den Cas di Cultura celebrando 50 aña dedica na su pasion cual ta baile, señora Diana Antonette a ricibi un reconocimento bon mereci for di Minister di Cultura Señora mr. Xiomara Ruiz-Maduro pa su 50 aña dedica na arte di baile y teatro.
E mandatario den su discurso a gradici Diana pa tanto inspiracion y dedicacion na e arte di baile na nos pais. Señora Diana ta e prome Arubiano cu a wordo otorga un beca for di Sticusa (Stichting voor Culturele Samenwerking) pa bay studia un profesion cu for chikito e tabata gusta, esta ballet.
Na September 1996 su soño a bira realidad ora ela a funda su propio scol di baile y ballet. Durante ultimo 50 aña ta masha hopi presentacion el a trece pa e publico cu su alumnonan, como tambe for di e grupo di baile un cantidad di grupo a nace y te awe a sigui engrandece nos folklore.
Aunke ballet ta su hobby y profesion, e tin un otro hobby cual ta teatro, na unda el a actua den diferente grupo. Cu Teatro di Dansa, Diana a representa Aruba varios biaha den exterior. Pabien na Señora Diana Antonette.
