Home » Prome Minister Evelyn Wever-Croes: CORSOU A HABRI FRONTERA MARITIMO CU VENEZUELA, PERO ARUBA KIER TIN MIHO CONTROL PROME CU HABRI FRONTERA MARITIMO

Prome Minister Evelyn Wever-Croes: CORSOU A HABRI FRONTERA MARITIMO CU VENEZUELA, PERO ARUBA KIER TIN MIHO CONTROL PROME CU HABRI FRONTERA MARITIMO

by Admin
0 comment 64 views

ORANJESTAD– Diahuebs ultimo a tuma luga e prome reunion entre autoridadnan aduanero y maritimo di Aruba, Boneiro, Corsou y Venezuela riba e condicionnan pa por habri frontera maritimo cu Venezuela atrobe.

Autoridad maritimo di Aruba kier mira palabracionnan transparente haci prome cu por bay bek na ‘Business as usual’, pasobra si tin un les cu nos a siña na Aruba, ta cu mester pone orden den tur e trafico na Waf di Barcadera. Autoridadnan Arubano a tuma e tempo aki pa cambia proceduranan pa garantisa un miho control, y awo falta solamente e palabracionnan haci cu autoridadnan Venezolano pa cu esaki.

Tin poco confusion den comunidad tocante e tema aki. E frontera aereo ta habri pa algun tempo caba, y poco poco ta yegando na normalidad. E conseho di biahe oficial ta sigui negativo pa Venezuela: si bo no mester bay, no bay. E frontera maritimo ainda ta cera desde 5 di januari cu Presidente Maduro a cera e frontera.

Dia 7 di april Minister Hulandes Blok a firma un convenio na Venezuela pa yega na apertura di frontera basa riba palabracionnan cu lo mester wordo haci entre autoridadnan Venezolano y di Aruba, Boneiro y Corsou. E reunion di diahuebs ultimo tabata pa cumpli cu e acuerdo aki. Esaki tabata e prome reunion, y lo continua dia 6 di juni.

Oponentenan ta specula cu Gobierno di Aruba lo no kier habri frontera, pasobra lo a haci compromiso cu importadornan Arubiano cu lo tene frontera cu Venezuela cera, pa nan busca fruta for di destinacionnan alternativo. Esaki no ta corecto.

Na januari algun importador a trece padilanti cu si nan haya garantia di Gobierno di Aruba cu frontera cu Venezuela ta keda cera 3 luna, nan lo por baha e gastonan di importacion. Sinembargo Gobierno di Aruba no por a haci ningun palabracion ni compromiso cu nan pasobra tur cos tabata depende di autoridadnan Venezolano.

Corsou mientras tanto ta ricibiendo barconan di fruta, bou di cierto condicionnan, pendiente e palabracionnan cu mester wordo haci ainda. Corsou a tuma e decision aki pasobra Corsou a wordo hopi mas impacta y perhudica door di e ciere di frontera, cu Aruba. Na Aruba nos tin e bendicion cu e impacto no tabata asina grandi, y pues cu nos por tuma tempo pa regla e asuntonan bon, pa evita un ‘free for all’.

Aruba lo habri frontera maritimo na forma ordena y transparente. Y esey por despues cu tin bon palabracion haci y firma. Nos no ta bay habri frontera na forma desordena y free for all. Ora nos habri frontera ta cu condicionnan hopi mas estricto pa evita tur loke tabata pasa den pasado. Y pa nos ta claro, esaki no ta un posicion di algun minister so, esaki ta e posicion di tur autoridad maritimo y instancianan encarga cu trafico maritimo na Aruba, y di henter Gobierno.

PALABRACIONNAN CU VENEZUELA

Nos kier yega na varios palabracion cu Venezuela.

(1) Ki tipo di boto mag di drenta cu carga: si ta pa nos, solamente botonan cu tin licencia pa exporta di Venezuela y ta cumpli cu exigencianan di siguridad.

(2) Ki tipo di carga nan mag di trece: pa evita cu Aruba ta bolbe wordo acusa pa contrabando, solamente e carga cu tin certificado di origen di Venezuela y ta wordo permiti pa exporta y sali di Venezuela na forma legal.

(3) Ken por drenta cu e barconan: si ta pa nos, solamente esnan cu ta cumpli cu tur rekisito legal.

Finalmente nos kier pa Venezuela asumi su responsabilidad tambe pa loke ta e trafico di persona y migrantenan cu ta purba drenta nos isla na forma ilegal. No ta husto cu ta na Aruba so nos mester atende cu e tema aki. Esaki ta responsabilidad principal di Venezuela, y nan mester carga nan responsabilidad tambe.

Pa yega na e palabracionnan aki mester di tempo. E siguiente simannan lo intercambia di documento y proceso pa reuni bek dia 6 di juni.

“Mi ta pidi pa duna nos departamentonan espacio pa por haci nan trabou debidamente. Nan trabou ta pa sigura nos costanan. Si nos kier pa nan haci nan trabou bon, ban duna nan espacio”, Prome Minister a finalisa pidiendo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio