Bubali: Diasabra den oranan di anochi, presencia di polis ta wordo rekeri na e Supermercado Superfood na Bubali pa un caso di ladronicia y cu e supuesto ladron lo ta bringando cu e trahadornan di Superfood, mesora centraal di polis a manda un patruya cu na e sitio.
Na yegada e polisnan a bin compronde cu e persona cu a horta, ta un studiante mericano kende ta bayendo Scol di medicina na Aruba. Ela drenta den Superfood cu e intencion di sali core bay cu algun cos sin paga. E hoben aki a coy algun paki carni y cornflakes y sin paga e kier a sali cana bay. Na momento cu ela yega na e porta y kier a core bay, ela wordo wanta pa guardsnan di Superfood, aparentemente e kier a bringa cu e guardsnan.
Segun e hoben studiante, e ta bayendo enberdad e scol di medicina na Aruba y tur luna e ta haya un cent pa pasa su luna, pero e luna aki e no a haya nada ainda y hamber a cuminsa dal’e hopi duro.
E agentenan na e sitio a hay’e tambe cu un sakito cu un contenido parecido na droga. E hoben studiante a keda deteni y a transporte pa Warda di Polis. Slachtofferhulp a wordo poni na altura di e caso aki.
E balor di tur loke e hoben kier a bay cu ne sin paga, tabata na un total di mas o menos 60 florin.