Hopi ta keha: “ay no, ban traha atrobe” mientras cu tin otro cu ta keha: “mare mi por tabatin un trabou”.
E efecto primario di traha ta, cu fin di luna bo tin un salario pa provee bo mes y eventual famia un existencia y porvenir digno. E efectonan secundario ta hopi mas grandi cu hopi di nos ta realisa. E momento cu bo ta lanta tur mainta bay traha bo ta inculcando disciplina den bo yiu(nan) cu tin abo como su ehempel. Bo ta demostrando bo yiu cu lanta tur dia bay traha ta duna boso tur un miho bida. Cu e dak riba boso cabez, e cuminda riba mesa, su uniform, su transporte, su diversion, tur ta danki na bo trabou di tur dia. Otro efecto secundario: e momento cu bo yega trabou puntual, bo ta demostra cu bo ta un persona responsabel creando caracter confirmando cu por conta cu bo productividad e dia ey. Bo presencia, bo trabou, ta yuda e compania cu bo ta traha p’e progresa cual ta sigura bo salario fin di luna y cu tempo hasta un aumento. E efecto secundario di sinti bo util, di ta laborando pa progresa ta yena bo cu poder propio.
Pero e efecto secundario mas profundo cu tur: cu bo trabou di tur dia bo ta construyendo e Pais cu bo yiu ta bay biba aden den futuro. Cu bo trabou di tur dia bo ta contribuyendo na Aruba su economia. Cu bo trabou di tur dia awe, bo ta invirtiendo den e Pais cu bo yiu lo hereda cu ta e hogar cu yama Aruba.
Como Minister di Labor mi ta trahando duro, y boso tin mi compromiso, pa sigura cu abo como trahador tin miho circumstancia laboral na trabou. Mi ta trahando duro pa esunnan cu ainda ta ganando salario minimo por logra aumenta esaki substancialmente pa bo por duna bo mes y bo yiunan un miho bida. Mi ta trahando duro pa esunnan cu solamente por haya trabou via un Uitzendbureau/Manpower/Contratista Laboral, pa elimina esunnan cu ta abusa di nos hendenan, como tambe regula y reforma cambionan cu ta obliga nan brinda bo garantia di trabou.
Ami como Minister di Labor ta lucha pa bo. Mi ta para pa bo. Mi ta defende bo. Abo tambe coopera cu mi. Cumpli cabalmente cu bo trabou, cumpli cu bo pais, cumpli cu bo famia, cumpli cu bo mes.
Feliz dia di Labor