ORANJESTAD, Aruba: E aña aki “Aruba Meets Europe” a tuma luga na Riu Palace Antillas, a tene un site inspection pa tur grupo presente. A introduci e agentenan di biahe di Europa na Riu Palace Antillas y na mes momento nan a experencia e atmosfeer di carnaval, cu ta parti di e cultura di Aruba.
E aña aki mas di 55 agente di biahe di diferente pais tabata riba e isla. E paisnan cu a participa tabata di Hulanda, Belgica, Alemania, Italia, Finlandia, Dinamarca, Irlanda, Inglatera, Polonia, Suecia, Spaña y Corsou. E rason cu a tene e evento aki ta pa promove Aruba como un destinacion di vakantie pa Europeonan, pero tambe pa agentenan di biahe por papia cu ehecutivonan local den turismo pa negoshi y pa crea/fortalece relacionnan duradero. Aruba Tourism Authority, Aruba Hotel and Tourism Association, AAA y diferente partner local a organisa e eventonan di “Aruba Meets Europe”.
Shari Sield, Sales Manager RIU Hotels & Resorts Aruba, tabata encarga cu e site inspection. E bishitantenan solamente no a experiencia tur loke e hotel tin di ofrece, pero tambe nan a disfruta di un lunch. Tambe a tene un competencia entre dos team, unda nan mester traha un ceviche.
Esaki ta prome biaha cu RIU Hotels & Resorts Aruba ta organisa e evento di “Aruba Meets Europe”. Riu Palace Antillas ta contento di por tin e grupo aki cerca nan y a gradici Aruba Tourism Authority p’e oportunidad di a tene e evento aki. E restaurant a mustra e bishitantenan kico tur nan tin di ofrece den nan menu. E grupo Europeo tabata contento di mira e productonan, mientras cu e hotel tabata contento di a participa den evento.
RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.