ORANJESTAD, Aruba: E aña aki lo mester tuma luga e di 16 exposicion y competencia di Obra di Arte Recicla organisa pa Aruba Hotel and Tourism Association (AHATA) y UNOCA, pero esaki no ta bay door.
Durante 15 aña diferente artista a mustra nan talento haciendo uzo di materialnan recicla. E aña aki no lo tene e competencia pa motibo cu AHATA lo haci cambio. E competencia di Obra di Arte Recicla ta uno hopi gusta p’e artistanan, scolnan, gruponan, pero tambe pa diferente persona y famia, kendenan ta admira e obranan di material recicla.
Na tur e fanaticonan cu semper ta pendiente p’e competencia di Obra di Arte Recicla, AHATA lo organisa e competencia di Obra di Arte Recicla na 2019 cu algun ahuste compara na añanan anterior. Lo bay ahusta e competencia na temponan moderno, unda artistanan lo por sigui mustra nan creatividad cu arte recicla. Ta pidi e artistanan pa ta pendiente pa otro aña, cual competencia lo tin un toke diferente.