ORANJESTAD, Aruba – E aña aki Palo Marga ta celebra su 35 aña di existencia y pa esaki ta organisa “The Revival of Palo Marga 2”. Lo tin participantenan local y internacional, cu lo participa den diferente careda. E evento lo cuminsa diamars dia 24 di April y lo termina pa dia 28 di April proximo.
Dia 24 di April e evento lo cuminsa cu inscripcion di e participantenan p’e show di auto y brommer, asina Magally Sanchez-Kock, di Revival of Palo Marga a expresa. E dia aki no lo tin competencia, pero lo tin diferente actividad manera kids corner, expo, D’Licious lo toca y hopi mas. Tur hende lo por cera conoci cu e pista di Palo Marga, pero tambe por cera conoci cu e participantenan internacional kendenan ta di Puerto Rico y Corsou. Vehiculonan tambe a yega caba, di cual tin di nan ta exponi pa esunnan cu kier mira esaki na Palo Marga. Tambe participantenan local a cuminsa pone nan auto riba pista di Palo Marga pa asina tur hende por aprecia nan durante e car & bike show.
Un evento popular cu lo tin ta e “match race”, cu hendenan gusta bet riba dje. Magally Sanchez-Kock a expresa cu expectativanan ta grandi door cu Aruba lo ta competiendo contra esunnan di afo. Tin autonan internacional cu a bin pa pone bon tempo, mientras cu tin autonan di Aruba cu tambe ta bon prepara pa e caredanan.
Diaranson 25 di April, lo tin test & tune. Riba e dianan di diahuebs 26, diabierna 27 y diasabra 28 di April lo tin e careda internacional, celebrando e 35 añanan di Palo Marga. Pa esaki tin e special riba pakete cu ta di 50 florin y por cumpra esaki solamente diamars 24 di April. E prijs normal di pakete ta 85 florin pero celebrando e 35 aña, lo duna un descuento di 35 florin. Pa cumpra ticket pa “The Revival of Palo Marga 2” por pasa na Palo Marga, unda lo tin e car & bike show.