Den cuadro cu tratamento di ley di presupuesto 2018 den parlamento, Parlamentario Daphne Lejuez a bin cu algun pregunta clave na direccion di gobierno. E parlamentario a entrega dos mocion tambe relaciona cu proyectonan cu mas camber di hotel pa Aruba.
E dos mocionnan cu a wordo entrega por medio di parlamentario Lejuez ta encera un peticion pa un analisis di costo y consecuencia pa nos comunidad di tur e personanan adicional pa cada camber di hotel. Y tambe moratorio riba proyectonan nobo di hotel, pa presenta un proyecto di ley pa fin di 2018 pa proyectonan nobo cu excepcion di boutique hotels di menos di 150 camber.
7000 camber adicional
Riba 18 di mei 2010, fraccion di AVP a entrega un mocion pa institui un moratorio pa hotel, timeshare y condominio cual a keda aproba pa parlamento. E tempo ey a urgi gobierno tambe pa entrega un proyecto di ley na parlamento dentro di un periodo di seis luna. Fuera di esaki, a urgi gobierno – pendiente e proyecto di ley aki – pa decreta un moratorio riba hotel, timeshare y condominio pa un periodo di por lo menos dies aña y publica e decreto aki den tur medio di comunicacion.
Sinembargo, pa 19 di april 2018, apenas ocho aña despues, por a constata cu a compromete e pais Aruba na proyectonan hotelero cu un cantidad di casi 7000 camber di hotel adicional. Di cual probablemente mita lo no por wordo anula.
Tereno ta birando schaars, y nos comunidad su desaprobacion continuo den medionan social y por medio di NGO’s pa locual ta destruccion di naturalesa ta sigui bin dilanti. Pero tambe tin un preocupacion grandi pa cu e cantidad di habitantenan cu nos isla por carga na un forma sostenibel, considerando e efecto di posibel expansion di camber hotelero lo hiba na mas persona for di exterior pa traha den e sector aki (2-4 persona pa cada camber adicional) cu tambe lo mester un vivienda, auto, scol pa nan yiunan, cuido medico y mas.
“Den luz di e desaroyo descontrola aki cu e gobierno anterior a laga atras di casi 7000 camber extra, kico ta minister di Turismo, Salubridad y Deporte su vision pa e desaroyo aki, y kico lo haci pa mitiga e posibel efectonan di e compromisonan laga atras pa e gobierno anterior”, parlamentario Lejuez a puntra den parlamento.
Expansion di Aeropuerto
Segun e parlamentario, a compronde cu pronto lo cuminsa cu e proyecto di expansion na AAA pa asina entre otro por añadi mas gates pa asina por aumenta e capcidad di ricibi turista. E parlamentario a puntra si gobierno por duna un splicacion di e inversion aki y su posibel efecto economico pa nos isla. E minister en cuestion a responde cu ta trata aki di proyecto Gateway 2030 na balor di 275 miyon di dollar cu lo dura tres aña y lo produci 400 cupo di trabou pa asina por aumenta e capacidad di arrivals y aumenta e cantidad di turistanan cu ta bishita nos isla.