ORANJESTAD — Parlamento a cuminsa trata e presupuesto pa 2018. Segun palabracion haci cu Caft y cu Hulanda pa mas tarda dia 30 di april e presupuesto mester a wordo trata.
Segun Caft e presupuesto manera el a wordo manda pa Parlamento ta e prome paso significante den soluciona e problemanan financiero di nos pais.
“E presupuesto ta un paso importante den soluciona problemanan di nos pais. E no ta facil y sigur no ta popular pero si necesario.
Cu e presupuesto aki nos ta pone Aruba bek riba e caminda cu e tabata, e caminda di stabilidad financiero y progreso y bienestar pa tur.
Una bes e presupuesto wordo aproba pueblo lo cuminsa mira e resultado di trabou intensivo den ultimo 5 luna:
1. Atencion social
Lo por emplea mas trahador social pa brinda cabes na e problemanan social den nos comunidad. Lo ekipa nan cu mas material pa atende cu e casonan extremo mesora. Lo enfoca tambe riba prevencion y riba inclusion y mas asistencia na nos hendenan special.
2. Vivienda
Despues cu e presupuesto pasa lo tin fondo disponible pa caba cu e trabounan di midi tereno y otorga tereno pa asina 1000 famia por haya tereno pa construi nan cas, di cual 200 cas social cada aña.
3. Siguridad
Cu e presupuesto aki Gobierno por adkiri ekiponan mas moderno pa bringa criminalidad, manera drone, helicopter, radar y auto nobo pa Polis.
4. Enseñansa
Cu e presupuesto aki por inverti den e edificionan decai di algun scol y mes momento inverti den mehora calidad di enseñansa.
5. Economia
Despues di pasa e presupuesto aki, Gobierno lo enfoca riba identifica e areanan cu mester pone mas atencion pa desaroyo economico y cu ta crea mas cupo di empleo. Turismo, Agricultura y Innovacion ta areanan cu lo trece hopi desaroyo.
6. Salubridad
Despues cu e presupuesto keda aproba, por caba di soluciona e problema di BIG, di mediconan cu a studia den region y asina por tin mas dokter pa baha e tempo di espera. Lo atrae mas dokter pa haci e servicio na Eerste Hulp mas rapido
Nos ta tuma e pasonan aki cu determinacion y cu curashi, pasobra nos sa cu esaki ta e unico caminda pa cuninsa soluciona e problemanan financiero di nos pais. Nos ta haci’e pa noa generacion, pa esnan prome cu nos y pa nos siguiente generacion. Nos mester tuma e paso aki pa libra nos futuro generacionnan di e peso di tur e debenan y pa crea oportunidad pa nan.
Mi sa cu no ta facil pa ningun fraccion den Parlamento. No ta facil pa pidi di fraccionnan di MEP, POR y RED cu a campaña contra e mal maneho di AVP y cu awor mester carga e consecuencianan di e mal maneho ey.
No ta facil tampoco pa e fraccion di AVP pa bay di acuerdo cu e presupuesto aki, como cu nan ta oposicion.
Pero realidad ta cu nos mester tuma e paso aki pa bienestar di nos tur hunto” segun Minister President Evelyn Wever-Croes