Home » Partido AVP ta pro destruccion di capital? Te ainda Mervin Wyatt Ras ta kere cu MEP tin e mesun mentalidad destructivo cu di AVP

Partido AVP ta pro destruccion di capital? Te ainda Mervin Wyatt Ras ta kere cu MEP tin e mesun mentalidad destructivo cu di AVP

by Admin
0 comment 76 views

Porfin politiconan di AVP a bin ta realisa cu gobernacion den un pais realmente ta un continuidad y cu no mester comete actonan destructivo ora cu como partido politico bo haya e oportunidad pa carga e responsabilidad aki. Asina nos di MEP a tuma nota con ultimamente politiconan di AVP manera entre otro e parlamentario Mervin Wyatt-Ras siman pasa ta declara cu “Gobierno actual ta ehecuta proyectonan di e gobierno anterior”. Pregunta na sra. Mervin Wyatt-Ras ta, cu si esaki ta algo straño of cu e tambe ta pro destruccion di capital?

Mal calidad di construccion
Hecho ta cu den un pais cu ta wordo goberna decentemente, esaki ta algo hopi normal, ya cu si tin proyectonan cu a ser laga atras pa un gobierno anterior, ta e deber pa e gobierno na mando continua cu e proyectonan aki, ya cu aki ta papia di placa di pagadornan di belasting. Mester remarca si cu e proyectonan cu Gabinete Mike Eman a laga atras na 2017, practicamente tur di nan ta yena di problema y obstaculo, tanto den calidad di construccion como den extra fondo cu mester ser hinca den esakinan (meerwerk). Asina nos por mira con e Green Corridor y Watty Vos Blvd ta ser confronta cu un gran cantidad di fayonan y tambe un Hospital renoba cu holor di diesel y cu lo bay costa 110 miyon florin extra, ya cu a lubida riba cambernan di operacion, unidad di cuido intensivo etc. Tambe un MFA di San Nicolas cu no por wordo construi ya cu e placa pa e proyecto aki a somenta, prome cu a pone e prome piedra mes.
Ta bisto cu sra. Mervin Wyatt-Ras nunca por a biba kere cu un gobierno responsabel manera di MEP-POR-RED ta continua cu tur e proyectonan aki, ya cu e mes ta hinca den un partido AVP cu ta sinonimo na boycott y ‘kapitaalvernietiging’ di un gran cantidad di proyectonan cu Gabinete Oduber a laga atras na 2009.

Boycott di varios proyecto di MEP
Ta increibel con na final di 2009 Gabinete Mike Eman a boicotia un gran cantidad di proyectonan noble y necesario pa nos comunidad. Proyectonan cu a ser boicotia tabata entre otro: 1. E proyecto di Fluff y Dump na Parkietenbos (Solid Waste Management), 2. Centro di Cardiologia na IMSAN San Nicolas, 3. Scol HAVO/VWO na Noord, 4. Parke deportivo di Little League na Pos Chikito, 5. Hotel di 5 strea Grand Melia na Bushiri, 6. E demas casnan social (mas o menos 100 cas) na Palisiaweg cu a inicia caba bao di Gabinete Oduber. Tambe no mester lubida cu nan tabata tin e intencion serio di boicotia e unico hotel di 5 strea Ritz Carlton, pero ora cu nan a sinti e rosea cayente pa cu un caso den Corte, nan mester a dobla rabo y para e boycott aki nan mes.

Pues por mira claramente cu partido AVP tin un mentalidad sumamente mezquino y destructivo, ya cu nan semper ora nan drenta gobernacion nan ta haci tur intento pa boicotia proyectonan noble laga atras pa e gobierno anterior. Lamentablemente parlamentario Mervin Wyatt Ras te ainda no ta mira tur esaki y awe ta kere cu partido MEP tin e mesun mentalidad cu nan, esta di destrui tur loke ta na beneficio di pueblo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio