Parlamentario Endy Croes a entrega mocion: Asfalta careteranan di tera, pone luznan den bario y pone sleeping police

Parlamentario Endy Croes a vocifera su mes diabierna ultimo durante un reunion publico di Parlamento cual a inicia 9 am y a termina diasabra marduga algo despues di 12 am, pues un reunion di algo mas di 15 ora largo. Durante e reunion aki a trata presupuesto 2018 di carteranan di Ministernan Otmar Oduber, Chris Romero y Rudy Lampe. Alrespecto infrastructura Endy Croes a elabora extensamente riba esaki splicando cu den diferente casnan y barionan cu el a bishita e peticion pa entre otro asfalt, luz den bario y sleeping police tabata inmenso. Den Noord manera por ehempel Alto Vista pariba, Washington, Sabana Liber, Seroe Janchi, casnan di pueblo, na Hato, Seneblar, na Sta Cruz Macuarima, Kas Ariba, Picaron, Papilon y Sabana Grandi, Sabana Basora y Pos Chiquito pa duna algun ehempel pero sigur rond Aruba ta rogando pa ayudo. Hopi ta pidi pa asfalt, otro ta solicita pa luz y diferente ta pidi sleeping police primordialmente barionan cu tin hopi mucha y ta preocupa pa cu nan seguridad door cu autonan ta core duro den bario. Na final di su disertacion Parlamentario Endy Croes a entrega un Mocion cu e peticion aki na Minister Otmar Oduber. Alaves den mesun mocion ta pidi pa inventarisa tur e peticionnan cu den pasado por a wordo entrega na DOW y inclui tur esakinan den un plan continuo pa structuralmente keda alivia barionan di nan dolor. Manera e programa di gobernacion “Hunto pa Aruba” ta menciona cu e parti mas esencial ta cu e hende mester ta central. Pa e motibo aki nos lo bringa y traha pa soluciona tur problema cu ta concerni “e hende” y ohala den 4 aña por resolve y alivia e gran mayoria. Na Hulandes nan ta bisa ‘waar een wil is, is een weg’. Esaki sigur ta nos “motto”, Parlamentario Croes a termina bisando.