Parlamentario Arthur Dowers: Pa prome biaha den historia un politico ta confirma persecucion politico

E reunion di Parlamento di diabierna pa tratamento di Presupuesto 2018 a marca un momento den historia di politica aki na Aruba, segun Parlamentario di AVP Arthur Dowers.
Ta prome biaha cu un Minister ta bini den Parlamento pa bisa cu e ta practicando persecucion politico.
Informacion cu AVP tin cu e Minister aki, Otmar Oduber, a duna ordo na diferente di su departamentonan pa persigui un persona cu a haci un construccion riba un pida tereno di un meter. Despues cu e funcionarionan en cuestion a menasa di basha e luga abou, e doño a dicidi cu e ta bay Corte.
E decision ta bisa cu si bo construi pa un meter sin permiso, corectamente nan por bisa cu bo mester deshaci di e construccion. Pero esaki no ta loke e Parlamentario ta bisa cu e ta cuestiona. E ta cuestiona con e mandatario ta midi cu dos midi, pasobra tin situacionnan cu si ta laga pasa. A cuestiona e punto cu ta tolerante pa cu cierto proyectonan y otro no.
Minister mes a confirma cu e ta tolerante pa e proyecto na Savaneta y cu el a bisa e funcionarionan di DOW pa sinta na mesa cu e desaroyadonan pa busca un solucion, ya cu diferente grupo a protesta contra esaki. Y e proyecto cu a wordo traha hunto cu Gobierno, y unda cu a haci adaptacionnan na dje, e mandatario no ta dispuesto pa sinta ni papia cu e persona.
No tabata kier a dun’e algun dia y a bisa cu lo manda basha e construccion abou.
Hasta por a scucha e mandatario bisa cu ta bay haci un investigacion na DOW, aparentemente riba e director tambe, ya cu e ta pensa cu nan a haci cosnan en pugna cu regla.
Con por ta, Dowers ta puntra, cu e Minister ta insisti pa e Director sinta cu personanan cu a haci cosnan en pugna cu regla.
“Kico bo ta haciendo bo mes como Minister. Abo no tin derecho di papia ni start ningun investigacion contra ningun director si bo mes ta manda e Director pa bay haci cosnan contra ley.
Mi ta spera e pueblo compronde ora cu nos bisa cu e Gobierno aki, principalmente e Minister aki, ta persiguiendo hendenan politicamente. Nos no tin nada contra ningun proyecto.
Nos simplemente ta bisa cu ta uza un regla pa persigui un hende cu a construi un bijbouw un meter sin permiso y ta duna ordo pa bash’e abou anto bo no por laga un hende haci henter un construccion den awa sin un vergunning.
Ta interesante pa sa si cualkier persona construi algo na Eagle Beach of Talk of The Town, e Minister ta manda basha esaki abou of no. P’esey ta interesante pa sa kico Hues ta bay husga den futuro casonan ora cu bira conoci e maneho di hancho pa un y smal pa otronan.
“Awe a keda confirma cu un Minister ta pretende di ta algo y a demostra den sala di Parlamento cu e ta totalmente otro. E siman aki cu ta bini mas di e casonan y lo mira con su maneho lo bay ta den casonan similar,” Parlamentario Arthur Dowers a declara.