Home » Un simpel aceptacion di un Friends Request riba Facebook a costa varios muher local hopi dollars

Un simpel aceptacion di un Friends Request riba Facebook a costa varios muher local hopi dollars

by Admin
0 comment 95 views

Varios muher local victima di estafadornan den exterior, via Facebook y Whatsapp.

Oranjestad: Arubanative.com a wordo acerca pa algun dama cu a bira victima di estafa for di exterior.

E tipo di estafa aki tin hopi aña ta tumando lugar, na cuminsamento tabata por medio di carta, despues por medio di mensahenan via cellular, bisando bo persona a gana un premio miyonario, na un pais na Europa y bo mester manda un suma di placa, pa nan por procesa e premio pa bo cuenta di banco.

Facebook friends request
Den e ultimo añanan esaki ta tumando lugar via facebook, varios dama local y no ta descarta cabayeronan local, ta haya friends request di hendenan den exterior, hopi biaha cu bon tipo, cu supuestamente ta Europeo of Mericano y ta trahando den paisnan na Africa Ghana, Nigeria etc of Sur Este di Asia, manera India, Bangladesh etc.etc.

Hayando mas confiansa
E acercamento ta cuminsa cu un simpel friends request cu e dama local ta acepta y asina ta crea un amistad. E estafador ta cuminsa busca pa haya mas confiansa, e ta pidi pa number di cellular, pa asina poco poco e yega mas cerca di e dama, e comunicacion ta bira mas facil, via whatsapp call of whatsap message. Algun siman of luna papiando hopi bunita cu e dama y a conquista e dama aki su curason, e ta cuminsa bisa cu e ta bin Aruba, bin bishita e dama, cu e dama ta e persona di mas bunita cu e por a conoce, etc etc. Hopi basilamento cu e dama, cu hopi biaha ta vulnerabel ta cay aden.

Modus operandi di e estafador
Ora cu e estafador aki tin e dama den su planta di man, siguientemente ta bay over na pidi e dama, un poco placa, usando diferente excusanan fofo, manera cu nan no a wordo paga ainda, e no a haya su cheque y asina hungando cu e dama su sentimento, pa mira con hopi placa mas e lo por saca for di e dama. Den un di e casonan recien, e estafador a usa e excusa, cu mandami cent, mi ta mandabo un maleta cu placa cash bo cuida pa mi. ESAKI tabata loke e estafador a bisa e dama local: “Mi maleta cu 120 mil dollar ta na Spaña y ora bo mandami e cent, mi lo percura pa e maleta aki yega te dilanti bo porta di cas”. E muhernan aki a bisa cu nan no ta compronde te ainda con nan por a cay den trampa di e estafadornan. Riba e imagennan por mira copia di un email, den cual ta pidi 2850 dollar pa e maleta.

Damanan a perde miles y miles di dollars
E estafadornan aki ta hopi profesional, cu ta operando riba facebook, cu fake accounts, fake profile pics y tur ta biba na Africa of Sur Este di Asia. Nan tur ta supuestamente naci na Europa of Merca. Tur nan potretnan ta mustra hombernan bon bisti y bon manteni, cual ta hacie hopi facil pa damanan cay den nan trampa.

Tur transaction di e damanan local aki a bay aparentemente via Western Union y den menos cu un minuut e placa aki ta wordo retira. Informacion cu Arubanative.com a ricibi ta cu hopi hende na Aruba y den exterior mes ta cayendo den trampa di e estafadornan aki. Ta varios personanan local a bira victima y ta birando victima di e estafadornan aki cu a perde algun miles y miles di dollars.

Evita di bira victima di estafadornan
Damanan local pa evita di cay den nan trampa, no acepta niun Friends Request di personanan cu no ta local, cu bo no conoce of cu no tin amistad mutuo cu otro di bo amistadnan riba facebook. Facebook ta un Social Media cu facilmente bo por crea hopi amistad bunita, pero tin hopi hende cu mente maligno tambe riba facebook, cu kier saca probecho di esnan mas vunerabel. Mucho menos no manda placa den exterior pa hendenan cu bo no conoce personalmente.

E transacion nan aki ta transacionnan no normal y por wordo registra na MOT, Meldpunt Ongebruikelijke Transacties, paso e dama ta mandando placa pa un persona cu e no tin niun relacion cune, es mas cu e ni conoce personal, tambe pa un pais cu nunca ela bishita.

E placa transferi  por wordo usa pa meta terorista
Den exterior tin hopi gruponan di estafador, cu ta biba di estafa esnan inocente of vunerabel, tin gruponan terorista cu tambe ta haci e tipo di estafanan aki, paso no ta tur tin suficiente fondo, pa comete actonan terorista y no ta descarta e posibilidad cu e cent cu e damanan aki a manda den exterior  ta wordo usa pa metanan teroristico.

Damanan local pensa bon, pa ora investiga gruponan terorista, boso nomber no wordo menciona como sponsor di e gruponan aki, cu ta matando centenares di hendenan inocente den e paisnan aki. Indirectamente bo tambe ta un complice di e actonan aki. Pensa bon paso haciendo transferencianan pa hendenan desconoci den exterior bo por ta sushando bo man cu sanger sin cu bo mes sa.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio