Diahuebs mainta, Parlamento a cuminsa trata Presupuesto 2018. Pa Gabinete Wever-Croes esaki ta un momento hopi importante siendo esaki e prome Presupuesto cu Gobierno actual mester defende. Prome Minister Evelyn Wever-Croes a indica cu prome cu a drenta den gobernacion, Gobierno di Aruba a haya un presupuesto den draft cla cu un deficit di 276 miyon florin. E buraco aki a wordo cera te cu el a yega na un deficit di 149 miyon florin.
“Bisando esaki ta indica cuanto Gobierno mester a corta den e presupuesto. Sinembargo Gobierno ta contento y satisfecho di toch a haya espacio cu nos por a inclui nos propio vision den Presupuesto 2018”, Prome Minister ta bisa.
Ministerio di Algemene Zaken cu ta presedi pa Minister President Evelyn Wever-Croes, a haci un ehersicio bastante intensivo y a yega na reduccionnan hopi grandi.
“Na mi bureau nos ta trahando cu 14 persona cu ta 10 porciento di locual Mike Eman a traha cu n’e. Kende a gasta miyones na personal, na biahamento y na fiestamento. Bahando gatto aki, a trece cu n’e cu nos a scapa 9 miyon florin den mi ministerio”.
Prome Minister a enfatisa cu esaki ta debi na e diferencia y e cambio entre un Minister President cu tawata gasta hopi cen cu un Minister President responsabel cu ta gobernando e pais aki actualmente.
“Aruba ta pasando den tempo dificil y ta baha gasto primeramente cerca nos mes. Un parti di e 9 miyon cu nos a baha cerca nos mes, nos a inverti den departamentonan cu ta cay bou di mi ministerio”.
Prome Minister ta indica cu e departamento di BUVO pa hopi tempo no a haya atencion. Gabinete Mike Eman tawata percura pa casi e departamento aki desangra. E departamento a splica cu nan a pidi 450 mil florin pa nan por haci promocionnan na television, radio y corant pa loke ta trata e maneho di Gobierno. Sinembargo aña pasa sr Eman a duna nan solamente 150 mil florin. Y riba dje, di e 150 mil florin aki, sr. Mike Eman a dicidi di gasta 90 mil florin pa paga pa gastonan di campaña di Partido AVP. Esaki mientras cu sr. Eman mes tawatin 1 miyon florin pa gasta den nan campaña.
E mandatario ta bisa du e vision di Gabinete Wever-Croes ta diferente. Gobierno ta traha cu tur hefe di departamento y ta inverti den departamentonan. Pasobra departamentonan mester ta fuerte pa por tin un Gobierno fuerte.
“A traves di nos vision nos lo pone e ser humano central. Nos lo crea oportunidadnan nobo a traves di innovacion, y nos lo trece nos yiunan di tera bek Aruba pa yuda nos engrandece nos economia. Un gobierno integro cu ta traha segun principionan di bon gobernacion, cu lo ta un ehempel pa mundo. Un Aruba sigur, cu progreso y bienestar pa tur hende, den un rumbo nobo cu oportunidadnan nobo pa futuro”, ta palabranan di Prome Minister Evelyn Wever-Croes.