Despues cu Gabinete Mike Eman den nan negligencia pa entrega e presupuesto 2018 na tempo na Parlamento, esta dia 1 di September 2017 y cual hecho tabata e motibo tambe cu mester a warda te ora cu e gobierno nobo di Gabinete Wever-Croes sinta pa cumpli cu e tarea aki, porfin ta asina leu cu e siman aki e presupeusto 2018 lo ser trata den Parlamento.
Fraccion di MEP, un fraccion di cual practicamente tur su miembronan ta nobo den e encargo aki, for di inicio caba a tuma henter e procedura pa trata presupuesto 2018 hopi na serio y den cuadro di esaki a haci un gran cantidad di pregunta, alrededor di 2000 pregunta na e ministernan di Gabinete Wever-Croes y cu esaki fraccion di MEP a demostra tambe di ta para critico den nan rol di controla gobierno manera nos constitucion ta prescribi. E preguntanan cu a ser haci tabata hopi alcaso y conciso y semper teniendo na cuenta e bienestar di nos conciudadanonan.
Tur e miembronan di fraccion di MEP a traha hopi duro, tanto den siman como den fin di siman, pa scrutina e presupuesto den forma eficiente, mirando e hecho cu e preguntanan mester a ser entrega na tempo na gobierno y p’asina presupuesto 2018 por a sigui su trayectoria, teniendo na cuenta cu e presupuesto mester haya su aprobacion prome cu fin di april 2018.
Awor ta asina leu cu diahuebs 19 di april a inicia cu e tratamento di e presupuesto den sala di arlamento. Por cierto como 8 luna laat y esaki danki na e negligencia y falta di seriedad politico di e gobierno anterior cu no kier a carga nan responsabilidad pa cu e ley di mas importante, esta e Budgetrecht. Pa e reunion di Parlamento di e siman aki y otro siman, henter fraccion di MEP ta hopi bon prepara y tur miembro di fraccion cu nan respectivo experticionan lo sa di hiba un bon debate, eficiente y profesional manera cu pueblo ta spera di su parlamentarionan.