Un tata participando na e programa piloto ‘Best Dad Ever!’ ta wak bek ki criansa ela ricibi for di su tata. ‘Best Dad Ever!’ ta un programa caminda tatanan ta participa na dies sesion pa asina aki discuti, papia, duna consejo y ricibi consejo tocante di con pa ta un mas mihor tata cu ta posibel. ‘Best Dad Ever!’ a ser desaroya y ta ser facilita door di Fundacion Telefon pa Hubentud Aruba y Tienda di Educacion.
Durante di e dies sesionnan aki diferente tema ta ser trata. Cada sesion ta trata un tema. Durante e sesion di e ‘Impacto di mi tata’, e tatanan a bai wak bek tempo cu nan tawata yiu y wak ki criansa nan a ricibi di nan tata y kiko ta e cosnan positivo y negativo cu nan a experiencia di e criansa di nan tata. Alcohol, Droga, violencia, falta di cariño, ta palabranan cu a ser menciona mas di un biaha durante e sesion aki. Un tata ta puntra: ‘Con ami por zorg pa ningun di e cosnan aki ripiti den e criansa cu mi ta duna mi yiu y den e relacion cu mi partner’.
E tatanan participando na ‘Best Dad Ever!’ ta sumamente entusiasma y ta atendiendo e sesionnan. Educa un yiu no ta facil, pero prepara bo mes pa un trabao duro ta hasi bo trabao mas facil. E tatanan tin hopi pregunta tocante educacion di nan yiu y ta ricibi informacion durante e sesionan. Durante diferente sesion tin diferente profesional cu ta aporta. Dorilis Werleman di Psycoach Aruba, Michael Quant di Baby Love Aruba y Famia Planea ta algun di e profesionalnan cu tambe ta aporta cu informacion.
Hunto cu profesionalnan invita Fundacion Telefon pa Hubentud Aruba y Tienda di Educacion ta trata di yuda crea e ‘Best Dad Ever’ y asina stimula tatanan pa ta mas involucra cu criansa y cuido di nan yiunan.