E presupuesto di 2018 ta e prome indicacion di cambio den maneho di Gobierno MEP/POR/RED. Si nos analisa algun area cu mester atencion mas lihe posibel na San Nicolas, lo mi concentra riba salud publico un rato. Instituto Medico di San Nicolas Dr. Rudi Engelbrecht tawata un proyecto completo y amplio di partido MEP den tur sentido, cu a wordo boicotia pa e ultimo 8 añanan y awor a cuminsa haya su atencion atrobe. Mester wak con pa hinca esaki den e masterplan total pa pariba di brug.
Desaroyo real pa San Nicolas
IMSAN mester bira un centro oncologico moderno pa combati e enfermedad di cancer efectivamente. Atrae turismo di salud y asina amplia nos pilarnan economico y trece desaroyo real pa San Nicolas. PAHO den pasado a recomenda Gobierno di Aruba pa traha un hospital nobo den area alrededor di ex-Drive Inn. Esaki pasobra e lo ta mas miho ubica/central pa e poblacion riba e isla. Gobierno di MEP e tempo ey a cuminsa cu e vision aki pero na caminda esaki a wordo cambia pa locual tin awe. Un expansion di Dr. Horacio Oduber Hospital cu tur e consecuencianan cu nos tur sa caba, mi no tin nodo di ripiti nan. IMSAN por bira e alternativa cu hopi no kier wak. Tin un grupito cu kier sigui “stroba” e oportunidadnan pa pariba di brug. Nos di Movimiento Electoral di Pueblo tin un vision pa e sector aki: Dos hospital completo y un centro medico den area di Paradera/Santa Cruz. Asina nos ta cuminsa elimina e problemanan den salud publico. E vision aki ta cuadra pa un poblacion di 120.000 habitante.
Mester inverti den SABA
Den e periodo di 2017-2021 San Nicolas mester tin un hospital completo cu un maneho nacional concreto bao di e Minister di Salud. Mester hiba un campaña di conscientisacion dirigi riba nos hubentud pa e retonan aki. Mester motiva nos hubentud pa bay den e sector di salud publico. E Minister di Salud actual, sr. Danguillaume Oduber a cuminsa haci e cambionan necesario di e ley di BIG (Beroep in de individuele Gezondheidszorg) pa esnan cu studia den region tambe por traha na Aruba. Den pasado tawata tin Lago Hospital, September 29, 1950 den “Colony”. Esaki lamentablemente a wordo cera. Den e periodo di gobernacion aki nos mester percura pa buta e fundeshi pa un Aruba cu por competi den region y den e mundo avansa den salud publico. Mester inverti den SABA Palisiaweg, un otro proyecto di MEP cu a wordo neglisha. Nos grandinan merece mucho mas y e sector aki ta cuadra atrobe den e vision di crea cuponan di trabao den e area. Si nos cuminsa awe pa e final di periodo di Gobernacion actual nos tin un hospital y cuido pa nos grandinan completo pariba y esaki lo contribui cu e desaroyo social economico sostenibel y duradero pa e siguiente generacionnan.
