Parlamentario Arthur Dowers di fraccion di AVP a atende cu presupuesto 2018, caminda el a enfatisa cu Raad van Advies a conseha Minister di Finanza Xiomara Ruiz Maduro, pa NO entrega e concepto di presupuesto na Parlamento tanten cu no a cumpli cu algun punto cu no ta mucho cla y transparente.
E parlamentario di AVP a trata entre oro e tema di personal, caminda MEP a campaña cu AVP tabatin demasiado hende den servicio y asina cu MEP drenta gobiern a core cu tur esunnan cu nan por a deshaci di nan, incluso algun di MEP mes, pero despues nan a core tuma bek.
“Awor a resulta cu nan a tuma mas personal cu nos gobierno tabatin den servicio,” Dowers a mustra nos por deduci for di e concepto entrega cu MEP a tuma al rededor di 400 persona den servicio. Nos no por bisa cu exactitud cuanto, pasobra Gobierno no ta duna un splicacion mucho cla riba esaki. Nos ta bisa asina pasobra si nan ta bisa di a kita mas di 300 hende y asina mes a bay dilanti cu 100 hende, e conclusion mester ta cu a tuma 400,” sr Dowers a mustra.
Di otro banda, e Parlamentario di fraccion di AVP a sigui mustra cu loke cu RvA no sa ta cu via di e diferente NV-nan crea, tambe Gobierno a tuma mas hende den servicio. Un di esunnan cu RvA ta menciona cu nan tin problema cun’e ta SERLIMAR.
Aki nan sa cu partido POR a hinca casi henter su lista den Gobierno, mandando nan e departamento aki, pero tambe na DIP. Esunnan den SERLIMAR no ta visibel den Presupuesto pasobra nan no ta wordo registra como cu nan no ta un departamento directamente di Gobierno.
“Si sigui asina aki, pa fin di aña nos por bisa cu nos tin laba-laba mas cu 1000 hende den Gobierno poni. Mi ta uzando pa esaki e mesun metodo di calcula cu MEP semper a uza pa yega n’e conclusionnan aki.
Tempo di AVP, ora cu MEP tabata den oposicion, semper nan tabata bisa cu mester haci loke cu Raad van Advies ta bisa riba e presupuestonan. Awor cu MEP ta den Gobierno, nan no ta preocupa cu e conseho di Raad van Advies y a manda e concepto di Presupuesto Parlamento sin haci e cambionan conseha,” Arthut Dowers a declara.