Recientemente Minister Glenbert Croes a tuma nota di e cifranan publica pa CBS den cual a keda constata cu 1437 hogar na Aruba ta sufri di pobresa severo y cu 6144 hogar ta na borde di probresa.
“E cifranan aki ta indigna mi” Minister a declara pasobra “un Pais di supuesto 5 strea hamas por tin famia ta pasa hamber y mester”. Otro prueba mas di kico tur a bay robes den e Gobierno anterior. Ta hopi factor hunto a conduci na e explosion social aki. Un Gobierno cu a neglisha e ser humano y a pensa 8 aña largo con pa haci negoshi uzando Pais Aruba. Un Gobierno cu a neglisha nos trahadornan local y a habri frontera sin tene cuenta cu e situacion di nos Pais. Un Gobierno cu 8 aña largo a haci fiesta y deroche cu ontheffing creando desempleo, fomentando e fenomeno di Cheap Labor cu awe un trahador local no por haya un trabou cu pago drechi.
“Pero dia cu mi a anuncia aumento di salario minimo, ta masha hopi a lanta bos contra e aumento aki. Mi pregunta na esunnan cu ta contra ta cu si ora bo lesa e cifranan publica pa CBS, ainda bo ta opone aumento di salario minimo?”, Glenbert Croes ta puntra. “Unda e bos halto di contra tabata ora Gobierno di AVP tabata desgraciando nos Pais? Bo ta realisa cu ta danki na entre otro e desastre di gobernacion di AVP y e silencio y tolerancia, cu awe 16% di nos pueblo ta biba den of na borde di pobresa? Esaki pa mi como Minister di Asunto Social ta inaceptabel. Pa nos Gobierno, e ser humano ta central. Calidad digno di bida di nos hendenan ta central”, un Glenbert Croes sumamente indigna a declara den mesun rosea confirmando un biaha mas su compromiso pa mehora calidad di bida pa nos hendenan, crea trabou cu pago digno pa nos trahadornan local, aumenta forsa financiero substancialmente di tur esunnan cu ta gana salario minimo. Esaki ta Minister Glenbert Croes su compromiso pasobra den un pais di “5 strea” hamas por existi pobresa. Y e invitacion ta na tur gremio pa hunto cu Gobierno di Aruba nos logra locual nos hendenan merece, un pueblo cu ta desaroya pareu cu su Pais. “Den maneho di Gobierno no ta permiti pa ningun hende keda atras”, Glenbert Croes a termina.