Parlamentario di fraccion di AVP, Sr. Richard Arends ta mustra cu gobierno ta creando un asina yama ‘perfect storm’ pa loke ta trata e efecto di e aumento di BBO y BAZV riba poder di compra.“Si nos haci un analisis di e pakete di medida cu ta na caminda y compara esaki cu e situacion cu a surgi na 2007, nos no por conclui otro cu gobierno ta creando atrobe un perfect storm.
Na 2007 nos tabata den un recesion economico prijsnan di energia cu tabata hopi halto y riba dje a introduci e BBO, cu a causa na dado momento un inflacion di riba 10% te cu un aña despues di su introduccion, algo cu na Aruba nos no a conoce nunca
Si compara cu situacion actual di aña 2018 ta casi similar na loke nos a biba 10 aña pasa: nos no tabata tin un crecemento economico te cu dos aña pasa, prijsnan di combustibel ta wordo wanta artificialmente halto dor di aumento di accijns cu 10 cen y riba dje gobierno ta aumentando e BBO y BAZV. Pues tin tur e factornan presente pa por crea un ‘perfect storm’ pa ocasiona un aumento substancial di inflacion y afecta e poder di compra di e ciudadanonan gravemente.
No ta un secreto cu bou signatura di AVP gobierno a introduci BAZV. E tabata un producto di Dialogo Social y a bay pareu cu reduccion di prima di AZV pa tur trahadonan manteniendo asina e poder adkisitivo mas cu ta posibel. E hecho cu no a logra elimina e di dos mitar di e BBO tabata a base di discusion nan den Dialogo Social tambe unda cu e conclui cu e reduccion di BBO no a resulta den un reduccion di prijs. Gobierno bou signatura di AVP a introduci rebahanan structural riba tereno di energia, reparatietoeslag pa esunnan cu ta gana bou di 2500 florin pa luna como tambe kindertoeslag. Di e manera aki a compensa e di dos mita di BBO ampliamente.