Recientemente Minister President di Aruba Sra Evelyn Wever Croes, contando cu henter apoyo di su Gabinete, a haci e anuncio di mas dificil di henter su carera politico, esta cu mester bay bin cu un crisisheffing pa yuda Aruba sali for di e abismo financiero cu AVP bou guia di Mike Eman a hinca nos Pais aden.
Ora cu a asumi su encargo como e Prome Minister di e Pais aki, hamas e por a imagina su mes ta den ki situacion precario y delicado e lo encontra Pais Aruba. E Gobierno anterior tabata sa asina bon con pa manipula, engaña y disimula, cu e susto di e realidad encontra tabata casi insuperable.
Imediatamente a cuminsa cu e ehercicionan necesario pa acapara e situacion aki, pa inventarisa e berdad pa por cuminsa traha efectivamente riba rescata nos Pais. Ora cu Prome Minister a kere cu mester bay sanea e situacion financiero di nos Pais, a resulta cu mester bay den plan di RESCATE pa evita pasa cu Aruba locual cu sosode cu Grecia, cu e Pais tin cu bati bancarota cu tur e consecuencianan implica.
Ademas di e berdad amargo aki, Prome Minister Evelyn Wever Croes tabata haya presion di Hulanda, presion di CAFT cu si Aruba no tuma medidanan contundente, cu Hulanda lo tuma e debido pasonan. Pues cu lombra contra muraya y cu cuchiu na garganta, cu e meta di evita cueste loke cueste cu Aruba ta perde su autonomia, Gobierno conhuntamente a tuma pasonan necesario.
Pero manera a subraya na comienso, ya no tabata trata mas di sanea nos situacion financiero. Ta trata di RESCATA nos Pais di un posibel “closedown”.
Gabinete Wever Croes a anuncia diahuebs ultimo e crisis heffing cu a haya tur atencion PERO a pasonan positivo tuma pa yuda esunnan mas vulnerable den nos comunidad a bay perdi den e mensahe. Nan ta como lo siguiente:
- E crisisheffing ta inicialmente te cu fin di aña of te ora e reforma fiscal keda cla
- Pa negoshinan chikito, pa e prome 12 mil florin ta haya exhoneracion di BBO
- Lo aumenta Reparatie Toesglag pa esunnan cu ta gana Afl 2400 of menos
- Pensionadonan lo conoce un reduccion den nan prima di AZV
Ta un anuncio cu hamas e Gobierno di MEP POR y RED a desea di haci. Pero e momento cu Pueblo di Aruba a duna e coalicion aki e mandato pa cambio, e mandato aki a encera drecha nos finanzas, salvaguardia nos autonomia y proteha nos Pais.
