Siman pasa diahuebs mainta durante conferencia di prensa, Prome Minister Evelyn Wever-Croes a anuncia loke e Premier a considera e anuncio di mas dificil di henter su carera politico.
Prome Minister a duna di conoce cu tawata un dia tracendental pa Gobierno di Coalicion di MEP, POR y RED y pa nos pais Aruba. Den apenas 4 luna di gobernacion, Gobierno mester a tuma algun decision firme pa coregi e rumbo ekiboca cu nos pais ta bayendo, y alabes stabilisa un crisis financiero cu ya a costa parti di nos autonomia y awor ta menasa di bay for di control y menasando asina nos bienestar actual y den futuro.
Na mes momento, Gobierno a anuncia cu den su plan di RESCATE, esta e Crisis Heffing lo duna compensacionnan na esnan mas vulnerabel den nos comunidad teniendo cuenta cu e crisis heffing lo afecta e personanan aki mas. Prome Miniseter Evelyn Wever-Croes a duna un enfasis riba e pensionadonan.
Pensionadonan cu ta pagando un Prima di AZV di 10.5%, inmediatamente esaki lo baha pa 6.5% ora cu e crisis heffing drenta na vigor prome di juli 2018. Esaki ta nifica cu un pensionado cu ta ricibi Afl. 2.500 pa luna lo paga Afl. 100 menos na AZV (Afl.262,50 na Afl.162,50) cu lo trece alivio na e ciudadanonan aki.
Entrante 1 di januari 2011 Gobierno di AVP hisa e prima di AZV di 9.5% pa 11.5% y na 2015 a baha esaki na 10.5%. Un medida cu a dal nos pensionadonan duro.
P’esey Gobierno di Aruba a haci tur posibel, pa den e crisis financiero cu Gobierno di AVP a laga atras, rebaha e peso di e prima di AZV pa e pensionado.
Nos pensionadonan tin prioridad pa nos Gobierno.