Minister encarga cu Turismo, Salubridad Publico y Deporte Sr. Dangui Oduber a reuni cu Consul General di Merca Sra. Margaret Hawthorne. Durante e reunion aki a elabora ariba diferente topiconan cu ta concerni e desaroyo di nos Turismo.
Crecimento Bishitante “stay-over” y Turismo Crucero
Pa locual ta trata e bishitante “stay-over” Aruba a conoce un crecimento compara cu aña pasa den e prome dos lunanan. Bishitantenan di Merca ta conoce un crecimento di alrededor di 8% pa e comienso di 2018. Turismo Crucero tambe ta conoce un crecimento significante den e prome lunanan di aña 2018.
Turismo di calidad ta pidi Servicio di Calidad
Minister Dangui Oduber a informa e consul Mericano ariba e maneho di su Ministerio di Turismo cu ta enfoca ariba mehoracion di calidad di servicio pa brinda na nos bishitantenan. Manera ta conoci caba Minister Dangui Oduber ta reconoce cu Aruba tin mester di mas Boutique Hotels y mirando e crecimento di Turista cu tin placa pa gasta na Aruba esaki sigur lo trece desaroyonan positivo pa engrandese nos Turismo y mehora nos servicio. Calidad riba cantidad, esey mester ta e enfoca.
Seguridad
E mandatario a informa e consul tambe ariba e desaroyonan di seguridad pa locual ta trata areanan hotelero. Manera ya caba ta conoci hunto cu Minister di Infrastructura y Medio Ambiente Sr. Otmar Oduber a institui un “Beach Policy”. Actualmente conhuntamente cu Minister di Justicia Sr. Andin Bikker y Aruba Hotel Security Foundation, lo bai concentra ariba e implementacion di camara di seguridad rond di e area hotelero pa asina garantisa nos bishitantenan cu e estadia placentero y sigur. Tambe ministerio di Turismo conhuntamente cu AAA N.V. lo bai hasi palabracionnan pa asina amplia immigracion mericano.
Maneho di keintura geel
A base di e maneho nobo aki e ta obliga turistanan cu ta biaha pa Aruba cu ta procedente di paisnan cu ta cai den e lista di paisnan cu riesgo halto pa cu e virus aki, pa vacunanan mes prome cu drenta Aruba. E ta obligatorio pa demostra na imigracion un certificado di vacunacion contra keintura geel manera e personanan aki baha foi avion na aeropuerto prome cu drenta Aruba. E certificado aki ta obligatorio pa hendenan y turistanan cu ta biaha pa Aruba riba 9 luna di edad, cu ta procedente di paisnan cu ta cai den e lista di paisnan cu riesgo halto pa e virus di keintura geel.
Minister Dangui Oduber y Sra, Margaret Hawthorne a goza di un reunion hopi fructifero y positivo.