Partido MEP a tuma nota di un carta di dia 21 di maart 2018 caminda ta indica cu Gobierno di Aruba a haci e ultimo pago di 5.1 miyon dollar pa loke ta e escandalo y aventura di e garantianan di SACE. E escandalo aki a inicia na momento cu durante 1986-1988 Gabinete Eman a otorga un sin fin di garantianan na e Mafianan Italiano y esaki relaciona cu e tres proyectonan hotelero Beta, Ramada y Plantation y cualnan tur a fracasa y laga den ruina atras door di e gobierno di AVP.
Sentencia di Corte Internacional
E gobierno di AVP a priminti di lora manga di camisa y bay Italia cu spada den man pa busca e solucionnan necesario. Sinembargo nada a ser logra door di e gobernantenan aki. Hecho ta cu asina Gabinete Oduber III a asumi mandato na November 2001, ya nan a haya nan mes confronta cu un sentencia di Corte Internacional na Den Haag caminda mester a paga di inmediato (‘uitvoerbaar bij voorraad’) un suma di 206 miyon dollar pa tur e tres hotelnan den ruina aki. Un suma astronomico cu a resulta imposibel pa e gobierno di MEP paga na e momento ey.
Solucion garantianan
Sinembargo Minister President Nelson Oduber y Minister di Finanza Nilo Swaen no a sinta man cruza, pero cu curashi y determinacion y sin ricibi ningun ayudo di Hulanda a bay Italia y a negocia cu sr. Giorgio Tellini di SACE pa busca un solucion y alabes a logra un reduccion di e debenan di garantia cu 100 miyon dollar. E acuerdo a encera cu lo paga 55 miyon dollar cash y e restante lo ser paga durante 15 aña largo na un suma di 5.1 miyon dollar tur aña. Pues dia 31 di maart 2018 ta e ultimo bes cu lo mester paga e suma aki y cual pago ya a ser efectua dia 21 di maart 2018. Cu esaki tambe henter e debe di 106 miyon dollar awor ta paga! Sinembargo nos mester puntra nos mes kico tur por a ser haci cu e 106 miyon dollar (190 miyon florin) aki pa entre otro inverti den enseñansa, salud, social, infrastructura, siguridad, si AVP no a hiba un maneho iresponsabel y descabeya durante nan gobernacion di 1986 pa 1988?
Otro pesadiya pa pueblo
Sinembargo awor cu a caba di paga e debenan di garantianan aki, pais Aruba ta ser confronta cu un otro pesadiya cometi pa e mesun partido AVP, ya cu na 2018 nos pueblo lo mester bay paga 66 miyon florin pa e debenan di PPP y na 2019 lo mester paga 81 miyon florin pa aña y durante 25 pa 29 aña largo pa e proyectonan aki. Pues asina nos por mira cu nos pais nunca mas lo haya alivio di paga y sigui paga pa debenan cu AVP ta crea den forma descabeya na momento cu nan asumi gobernacion. Echo ta cu debe, garantia y desaster financiero ta sinonimo na AVP y esaki por a ser experencia tambe na momento cu nan a bandona gobernacion na final di 2017!
Finalmente MEP ta gradici tanto Nelson Oduber como Nilo Swaen cu a logra trece claridad den e asunto di garantianan y nan habilidad pa logra tambe di reduci e debenan di garantianan cu 100 miyon dollar, sino pais Aruba lo mester a sigui paga e debenan aki pa por lo menos 15 aña mas. Cu sentimentonan mixto partido MEP ta bisa pueblo: Pabien!