Manera ta conoci, dia 21 di maart tabata dia Internacional di e Hendenan cu Discapacidad. For di december 2011 Nacionnan Uni a proclama e dia aki pa honra e personanan cu discapacidad di tur parti di mundo y busca pa fomenta consciencia pa e condicion aki. Dia 1 di december 2017, gobierno actual tambe a ricibi e tratadonan di derecho di hende special traduci na Papiamento y a ratifica esaki.
Parlamentario pa partido MEP, Sue Ann Ras ta mustra den cuadro di esaki cu, segun informacion estadistica, e poblacion mundial di hende cu discapacidad ta mas di mil miyon persona y mas di shen miyon ta mucha, di cual e muchanan cu discapacidad tin 4 biaha mas posibilidad di ta victima di algun tipo di violencia y 80% di e personanan cu discapacidad ta biba den e paisnan desaroya y 50% di e personanan cu discapacidad no tin acceso na sanidad.
INCLUSION
Educacion segun Ras, ta clave den esaki y mester ta un derecho fundamental, unda cu tur persona cu algun discapacidad mester tin acceso y educacion extendi como un vehiculo pa tur hende tuma consciencia di e situacion aki. “ Cu e conocemento apropia di e situacion y e sensabilizacion necesario, sigur nos por aporta nos parti tambe pa construi un sociedad mas inclusivo”, Ras a sigui bisa.
Segun e parlamentario, inclusion ta un palabra hopi menciona pa e hende-, organisacion- y institucionnan cu ta traha pa mehora e calidad di bida di e personanan cu discapacidad. E ta mustra cu nos por defini inclusion como amor, aceptacion, tempo, reconocemento y respet. “Como un bon ciudadano nos mester t’ey pa yuda y sostene pa e derecho aki bira un realidad, door di tin un actitud mas proactivo, participando na e actividadnan cu ta promove e situacionnan cotidiano. Nos no mester limita nos mes na kere cu inclusion escolar ta soluciona tur cos”, Ras a continua bisando. Inclusion mester cuminsa for di nivel micro y di eynan sigui extende. Nos mester inclusion completo den tur ambito y lugar: parke, cine, club deportivo, scol, empresa, pelukeria, banco, celebracion familiar, nos leynan etc. Nos mester compronde cu door di convivi cu diversidad, nos tur ta gana.
OLI
E empresa di fabricacion di popchi cu apariencia real ‘Casita de Muñecas’ na Argentina a presenta dia 21 di maart e prome popchi baby cu Trisomia 21, den e marco di un serie di actividad, cu Argentina a realisa pa Dia Internacional di e Personanan cu Sindrome di Down.
Oli ta un proyecto di mas di 2 aña y nan tabatin e conviccion di hacie un producto nacional di calidad. Oli a nace pa apoya e pluralidad y fomenta for di chikito caba e diversidad. Segun e empresario Galantemi, e popchi nobo aki, tin e gestonan y e caracteristicanan di e personanan cu sindrome di Down y ta basa riba e anecdota aki: Un persona a conta cu el a puntra un mucha muhe cu sindrome di down si e ta gusta popchi. Pero e mucha a contesta cu no, pasobra no tin ningun cu ta parce. Ora cu nan a scucha esaki, nan a sinti cu nan mester haci algo pa yuda e mucha aki y tur e otro muchanan mas, cu sigur tambe a pasa den e situacion aki.
“Definitivamente Oli tin como meta pa habri e curason y tira tur e bareranan abou cu tin den un sociedad. Nos tin cu construi un sociedad basa den e diferencianan pa por logra un sociedad mas inclusivo”, Parlamentario Ras a finalisa bisando.