Miembro di fraccion di AVP den Parlamento, sr Richard Arends, a mustra durante conferencia di prensa, cu ta bon pa clarifica algun ponencianan cu a bin ta wordo haci relaciona cu finanza publico di Aruba.
Sr Arends a mustra cu cu finanza publico tabata e area cu mas escrutinio y transparencia tabatin den e ultimo 4 añanan caminda Gabinete Mike Eman II a entrega tres presupuesto, tres presupuesto supletorio, tres cuenta anual y dies ‘uitvoeringsrapportage’ pa dies 10 kwartaal sigui, unda cu entrada y gastonan ta wordo analisa cada kwartaal. No solamente a cumpli pero a raporta riba e tema aki.
“Ora mi tin tende minister encarga cu finansa publico papia di manipulacion, mi kier sa na kende e ta referi, pasobra tur cifra den e documentacion a wordo suministra dor di e departamentonan concerni na Minister di Finansa y nan a wordo controla y analisa dor di e profesionalnan di Contraloria General y CAFT.
Pesey ora cu mandatarionan bisa cu nan a keda sorprendi cu e cifranan no ta realistico, simplemente ta mustra un falta di conocemento di e materia y cu tempo nan tabata parlamentario, no a haci nan trabou manera debe ser.
Esaki ta un falta di respet pa e institutonan y e profesionalnan cu ta traha den e organisacion y institutonan aki,” Parlamentario Arends a mustra.
E la reacciona tambe riba un declaracion reciente minister encarga cu finansa unda cu e la bisa publicamente cu 93 cen di cada florin cu nos ta genera den nos economia ta bay pa paga.
“E comparacion cu e mandatario a hasi ta completamente eroneo: e la dividi e debe total cu ta madura den terminonan di varios aña door di e volumen di actividadnan economico di un solo aña,” Sr. Arends a splika. “Cu tipo di manipulacionan asina, obviamente bo ta yega na cifranan despropocional.”
“Ora cu nan bisa cu mester bay haci un prestamo di mas cu 700 miyon florin, – teniendo na cuenta un deficit di rond di 155 miyon florin atrobe mescos cu na 2017 – ta inclui aki un refinanciamento di rond di 550 miyon, cual ta un suma substancial. Si bo tene na cuenta cu cada fiansa tin un averahe di 10 aña prome cu nan caduca, bo ta papiando aki di e debenan cu e ultimo gobernacion di MEP a hasi prome cu 2009.
Durante Gobiernonan bou signatura di AVP nos tambe a paga debenan cu diferente Gobierno mester a haci pa cubri e deficitnan aki y nos a haci’e sin haci politikeria. Ta straña mi cu personanan cu mester tin conocemento financiero, ta haci politica cu algun situacion cu ultimo añanan semper a tuma luga,” Parlamentario Richard Arends a mustra.