Seroe Patrishi – Diahuebs mainta pa mas o menos 11:50 dos empleado di W.E.B nv a bay un cas den Seroe Patrishi pa cera of bay cu e meter di awa.
E habitante un señora lo a sali y a splicanan cu esey lo no ta corecto, pa motibo cu e tin un areglo di pago haci.
Aki ta caminda cu e situacion a cambia. E empleadonan lo a bira yama nan hefe, y ela duna nan ordo pa dal bay u kita e awa.
Pues no ta importa si tin areglo haci of no.
Di e manera aki a yama pa polis, pa motibo cu segun W.E.B nv, e habitante lo ta haciendo problema.
Algun minuut despues polis a yega, pero ordo ta ordo y asina mes e awa a wordo kita.
E habitante mas cu claro a keda tristo, mirando cu awor e mester bolbe bay W.E.B pa bay sinta y wak kiko nan ta bay bise. Sin puntra si e habitante tin e placa completo awe pa nan pone awa bek.
Un situacion social horibel cu algun persona cu no tin e manera pa cumpli cu nan debernan di tur luna. Nos sa cu ta trata di un grupo hopi hopi grandi, cu ta pasando den situacionnan dificil.
Arubanative.com a tuma contacto cu WEB y a haya e siguiente informacion, cual sigur ta bon pa cada cliente di WEB tene cuenta cu ne. “Si un cliente tin un areglo di pago y e no ta cumpli cu e condicionnan di su areglo, WEB lo desconecta e meter y e lo mester paga full e suma cu e ta debe. Den otro palabra, lo cancela e areglo di pago di e cliente. Si e cliente tin un areglo di pago, e no por pidi un extension di e deadline cu e tin pa haci e pago.”
