Diaranson mainta, Prome Minister Evelyn Wever-Croes a ricibi bishita oficial di representantenan di Banco Central Aruba (BCA). Na e ocacion aki, Presidente di BCA sra Jeanete Semeleer a entrega Minister President e raport ‘Isla Innovativo’. Isla Innovativo ta un concepto pa innovacion cu Gobierno di Aruba por tene den consideracion pa e desaroyo cu e plan nacional di innovacion. Di e manera aki Gobierno ta demostra su compromiso cu tapa traha hunto cu nos institutonan den un forma transparente y sector priva pa crea plataformanan moderno di colaboracion.
E plan di Isla Innovativo ta identifica oportunidadnan nobo pa Aruba pa innovacion y diversificacion economico pa asina crea motornan nobo pa crecemento responsabel den futuro. Isla Innovativo ta contene diferente recomendacionnan pa stimula nos economiainnovacion. Ehempelnan di e recomendacionannan aki ta: Con Gobierno por sirbi e comunidad y bishitantenan di un miho forma y mas eficiente. Cua ta e inversionnan cu lo mester haci awe pa por crea solucion duradero pa mañan. Con por mehora nos productividad y fortalece nos resistencia pa adapta di forma continuo y con nos por crea oportunidad pa e ingeniero digital of cientifico di data cu aki cinco of diez aña tin diferente oportunidad y proyecto npa Aruba.
Presente na e reunion tawata Chief Innovation Officer, sra. Varelie Croes kende ta bay yuda Gobierno di Aruba pa desaroya e plan nacional di innovacion. Varelie ta un yui di tera cu experiencia amplio den innovacion y tin tambe un trayectoria extenso den finansas y ley, un base amplio y diversifica.
Como pais nos kier ta cla pa e futuro nobo aki, un futuro moderno, cu tin oportunidad pa nos hobennan, y pa nos hendenan keda central, pa asina nos asegura cu esnan mas vulnerabel den nos pais no wordo lubida, pero al contrario, poniendo e ser humano central den un plan di innovacion lo beneficia nos pais di un manera asina positivo cu nunca antes nos a conoce. Esaki ta posibel cu un plan integral di innovacion pa pais Aruba y e ekipo pa ehecuta esaki.
Prome Minister a elogiata gradici CBA y Presidente sra. Semeleer pa e iniciativa aki di colaboracion y innovacion y a expresa cu inversionnan den innovacion ya no ta un opcion sino un mester pa garantisa exito di Aruba den futuro. Pronto e mandatario lo informa comunidad, sector priva y sector publico tocante e pasonan cu lo bin.