Home Local Despues di un proceso di consulta amplio a dicidi di nombra Sr....

Despues di un proceso di consulta amplio a dicidi di nombra Sr. Steven Andrew Hoo como hefe di polis interino

SHARE

Aruba tin un hefe di polis interino nobo. Den conferencia di prensa diahuebs atardi Minister di Husticia, mr. Andin Bikker a anuncia e decision pa loke ta trata Korpsleiding. Manera ta conoci, momento cu minister Bikker a asumi responsabilidad como Minister di Husticia, a bin topa cu un situacion unda Hefe di Polis actual Sr. Richardson a indica cu e kier bay pa un reto nobo. Mesora a bay den un proceso di consulta sumamente amplio pa busca un persona cu por bira un hefe di polis interino. Por a sinti cu tabatin pregunta y preocupacion di comunidad pero a tuma tur tempo pa yega na un decision, pasobra na final di dia e funcion aki ta sumamente importante pa trankilidad y siguridad pa comunidad di Aruba. Durante e proceso a consulta cu coalicion y oposicion den Parlamento, a papia cu diferente persona den cuerpo y tambe esunnan cu pensioen for di cuerpo pa yega na un decision segun Minister Bikker.

E consulta awe a tuma e rumbo cu den conseho di Minister a tuma un decision di principio caminda a dicidi di nombra Sr. Steven Andrew Hoo, como e proximo waarnemer pa KPA. Segun Minister Bikker ta bay tin un fase di transicion cu lo tuma luga aki un par di siman, for di e di e Korpchef actual. E tareanan di Sr. Hoo segun e mandatario ta pa trece union den e Korps, trece trankilidad y tambe percura tur demanda basico pa loke ta trata material haya atencion.

Mester hiba Cuerpo Policial den un dimension nobo pa loke ta trata aplicacion di tecnologia cu mundialmente ta yuda tur cuerpo policial pa brinda un miho servicio pa pueblo y e bishitante. Pa minister Bikker, ta un honor y placer di anuncia e decision di Conseho di Minister.

Tambe Minister Bikker ta sumamente gradici na tur persona cu a yuda durante e proceso di consulta y tambe na hefe di polis actual pa su cooperacion cu el a duna y sigui duna pa tin un traspaso ordena pa e Korpschef interino nobo drenta den su funcion. Paralel cu nombramento di Sr. Hoo lo cuminsa cu e procedura di solicitud na cual tur persona por solicita, incluyendo Sr. Hoo pa asina yega na un Korpschef definitivo. Tarea principal di Sr. Hoo ta pa trece union trankilidad y mas cu tur cos garantisa siguridad di tanto e pueblo como e bishitante pa Aruba su economia sigui florece segun Minister Andin Bikker.