Home Politics Minister President Evelyn Wever-Croes: AUMENTO DI SALARIO MINIMO TA DEN PLAN DI...

Minister President Evelyn Wever-Croes: AUMENTO DI SALARIO MINIMO TA DEN PLAN DI GOBIERNO

SHARE

Den conferencia di prensa di Gobierno, Prome Minister Evelyn Wever-Croes ta aclaria confusionnan cu tin rond di e anuncio cu Minister Glenbert Croes di Labor a haci tocante aumento di salario minimo mas tempran den siman. E mandatario a duna di conoce cu ya na varios ocacion a informa cu pa loke ta trata e poder di compra y e capacidad di esnan cu tin un salario hopi abou pa yega na aumenta e poder di compra tin diferente manera pa yeg’e.

 

Prome Minister a informa cu Gobierno ta evaluando con pa yega na un miho balanse y ta menciona diferente opcionnan cu a wordo studia. Un opcion ta pa hisa e salario minimo conbina of den un pakete cu reduccion di winstbelasting, esta e belasting di e comerciante cu e  tin cu paga salarionan pa asina e ta subi di un banda pero pa e comerciante e por baha. E motibo pa haci esaki den forma di pakete ta pa asina purba na un manera of otro garantisa cu si hisa minimum loon esey no kiermeen cu e comerciante ta bay inclui esaki den e prijs pa e consumidor cumpra.

 

Un otro opcion cu ta wordo evalua, segun Prome Minister ta door di structuralmente tur luna bin cu un vakantie uitkering of vakantie toelage pa personanan den sector priva anto duna un incentivo pa e doño di trabou.

 

E mandatario a menciona un di tres opcion cu ta hiba atencion di Gobierno y esaki ta e reparatie toeslag cu a wordo implementa door di e Gobierno anterior cu a encontra cu un cambio na caminda cu a pone cu esnan cu ta gana mas di 2500 florin tambe ta bin na remarke pa haya reparatie toeslag cua no tawata e intencion desde principio. Esaki ta den proceso pa wordo cambia pasobra ta solamente salarionan te un cierto limite mester haye. Y e suma cu lo scapa aki lo wordo duna na esnan cu si ta haye y asina por aumenta e suma un poco.

 

Gobierno ta den e proceso pa mira con por yuda esnan cu tin un entrada abou pa nan poder di compra por aumenta. Discucionnan ta andando. Un comision di tripartite a wordo institui bou dirigencia di Minister Asuntonan Social y Labor y lo haci Social Economische Raad, SER tambe miembro. Pa tur loke ta trata minimum loon mester pasa na SER prome. SER sa cu Gobierno aki ta un gobierno serio.

 

Refiriendo na e reaccionnan den comunicad, Prome Minister ta duna di conoce cu e ta contento cu organisacionnan cu ta representa comercio y organisacionnan cu ta representa trahadornan den diferente sector a cuminsa vocifera nan opionnann y a trece nan puntonan dilanti. Den un forma bisa, nan a lanta for di soño. Pasobra si ta bay ta hopi sincero, pa ocho aña no a tende di ningun di nan.

 

Sinembargo e discucionnan aki ta parti di discusionnan grandi cu ta andando. Manera ta conoci pa tur hende, no por cambia salario minimo durante aña. Mester warda te fin di aña si kier cambia esaki na un manera substancial. Ta pa e motibo aki tambe ta cuminsa cu e deliberacionnan awo caba.

 

Prome Minister ta enfatisa cu ora Gobierno aki tuma un decision, e ta tuma un decision bon evalua y ta busca consehonan. Ta pa esaki ta den Gobierno. E tema di minimum loon ta un tema cu ta andando den discucionnan cu seriedad. Tur instancianan lo wordo involvi den esaki especialmente SER cu tin representacion di doñonan di trabou y di trahadornan.