ORANJESTAD, Aruba – 20 di Februari 2018: MetaCorp hunto cu su subsidiario ATCO Concrete Products situa na Barcadera a celebra añanan di servicio di 3 empleado, kendenan hunto a alcansa 70 aña di servicio. Tur 3 empleado ta traha pa ATCO Concrete, nan ta Cesar Correa y Jorge Pantoja di 25 aña di servicio respectivo y Antonio Henriquez di 20 aña di servicio. En conneccion cu esaki Managers Robby Fingal y Jose Wernet a hiba palabra y conta un poco di nan historia.
Cesar Correa a cumpli 25 aña den servicio cu ATCO Concrete Products. Cesar a cuminsa traha cu Delta Contractor, unda el a traha na Concord Hotel y despues riba e pista di aeropuerto. Ora cu trabao na aeropuerto termina el a bai traha cu negoshi di scrap den refineria, na momento cu tabata intersa pa desmantela e refineria. Asina aki Cesar a bin den contacto cu supervisor Robby Fingal y a traha cun’e pa hopi aña. Cesar a cambia di departamento y asina bai traha den garashi di ATCO pa un temporada. Aki el a bin traha cu e diferente equiponan, Cesar a siña opera truck door di cada bes staciona y saca trucknan for di garashi.
Na 1999 Cesar Correa a bai traha cu ATCO Concrete y asina el a bira chauffeur di e truck cu ta entrega bloki. Richard de Veer, Acting Managing Director di ATCO Concrete Products, a felicite y alavez gradicie pa su añanan di servicio y sperando di por conta cu Cesar hopi aña mas. Cesar Correa a expresa cu e lo sigi haci su maximo esfuerso den su trabou y e ta gradici e compania di a dune e oportunidad di forma parti di e famia di MetaCorp. El a felicita su coleganan cu tambe ta cumpli nan aniversario.
Jorge Pantoja a cuminsa traha 26 aña pasa cu Delta Contractor y despues di 1 aña el a drenta den servicio fiho cu ATCO. Durante añanan el a traha riba diferente projecto, entre otro Renaissance Island, na Spaanslagoen y despues el a bai traha den garashi di ATCO. Jorge Pantoja a haci diferente trabou na ATCO y a crece den su trabou. Na aña 2000 el a bai traha na planta unda cu el a cuminsa como chauffeur y helper. Despues di algun cambio na ATCO Aruba, ATCO Concrete tabatin mester di chauffeur. Asina aki Jorge a bira chauffeur di mixer pa ATCO Concrete. Jorge a expresa di ta contento cu su 25 aña di servicio y ta gradici Dios pa esaki. Tambe el a gradici tur su coleganan y hefenan pa e pasenshi cu nan tin.
Tambe ATCO Concrete tin e orguyo di tin Antonio Henriquez, kende ta un di e poco operadornan cu ta haci diferente trabao. Antonio Henriquez a gradici Dios pa por forma parti di e compania pa 20 aña y tambe a gradici su coleganan. El a bisa e empleadonan nobo tin hopi cos cu nan tin di siña di e compania y tur esaki ta beneficioso pa nan. El a gradici famia de Veer y tur empleado cu e la traha den transcurso di aña cu nan den MetaCorp, pasobra nan a dun’e apoyo den temponan bon y malo.
Coleganan y famia a bini hunto pa asina celebra e añanan di servicio di e empleadonan aki. Gerencia ta gradici nan pa tur nan dedicacion den nan trabou.