A manda busca experto di Hulanda pa yuda den e proceso
ORANJESTAD, Aruba – “Danki Dios e daño ta material y no tabatin herido. Esey ta nos prioridad”, asina Ir. Ernand “Mike” De L’Isle, Gerente General di Aruba Stevedoring Company N.V. (ASTEC Aruba) a reacciona, relaciona cu un accidente diabierna ultimo prome cu merdia durante cu tabata descarga un barco. Ey un “sling” a kibra, cu consecuencia cu e carga, cu net tabata tin’e lanta na apenas 2 meter, a bay cay bek den bodega di e barco.
“E proceso a wordo prepara di acuerdo cu nos standardnan/proceduranan y manera cu nos a haci varios biaha caba cu tipo di carga similar. E empleadonan na warda, tur cualifica pa e tipo di trabounan aki, contando cu supervisornan cu experencia y conocemento di maneha carga pisa hunto cu un di nos safety inspectors presente”, asina Mike de L’Isle a splica. Es mas, den pasado a realisa e mesun tipo di trabou specialisa asina cu exito caba.
E trabou tabata pa descarga un grua cu ta pisa 60 ton, cu tabata den bodega di e barco di carga. A uza e “Mobile Crane” di ASTEC, cu ta capas di carga un peso di 104 ton. A uza 4 “sling” pa lanta e carga, di cual cada un “sling” ta capas di carga 30 ton. “Pues nos a uza suficiente capacidad pa por realisa e trabou aki. Pero asina mes, un di e slingnan a kibra, e carga a cay bek y a haci daño na e barco”.
E compania a manda busca un experto urgente di Hulanda cu a yega Aruba diasabra caba y mesun anochi a reuni cu ASTEC pa mira con ta atende e daño, dreche, pa asina e barco por continua su ruta y riba locual ASTEC a sigui traha diadomingo. E companianan di seguro di ambos partido tambe ta envolvi.
Den tipo di industrianan asina ta haci lo maximo, uzando ekiponan cualifica y cu trahadonan certifica/cualifica pa por haci trabou di stiwa carga. Asina mes, pa diferente factor, e tipo di accidentenan asina por sosode, pa cual ta investigando awor unda algo a bay robes den e proceso y siña di dje pa evita cu algo similar sosode atrobe.
ASTEC N.V. ta existi desde September 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.