Home Politics Fraccion AVP: Menasa di Minister pa ‘ontruim’ kiosconan na waf ...

Fraccion AVP: Menasa di Minister pa ‘ontruim’ kiosconan na waf ta acto criminal

SHARE

E sed pa poder, e sed di vengansa y e dominio di su odio grandi contra di partido AVP, ta pone cu Minister di Infrastructura, Otmar Oduber, ta hibando un maneho cu ta similar na loke ta pasando den pais bisiña Venezuela, segun fraccion di AVP ta mustra.

Esaki a bolbe sali na cla cu ainda tin mas persecucion di parti Gabinete Wever Croes, ora cu 15 mama y tata di famia,  kendenan ta huur un kiosco,  a haya carta di menasa di Minister Otmar Oduber cu nan mester entrega e kiosconan cu nan ta huur na Welcome Plaza na waf di Oranjestad.

Pa pone forsa tras di su menasa por escrito, e Minister a dicidi di manda  su team na DIP pa sigui intimida e huurdonan di e kiosconan den un forma ainda mas serio caminda e biaha aki, nan a bin cu otro carta di menasa, den cual nan ta ser informa cu Minister Otmar Oduber, ta laga ‘ontruim’ e kiosconan pa dia 2 di februari cu man bruto.

Un intimidacion nunca bisto dor di un Minister kende a menasa di uza forsa bruto contra di e huurdonan di e luganan aki, cual ta un proyecto di ex Minister di Infrastructura Benny Sevinger, pero cu Minister Oduber semper a pronkia cu esaki.

Sinembargo Aruba ta parti di Reino Hulandes, ta un pais cu tin democracia y leynan existente pa frena e tipo di abuso di poder aki di e Minister y e huurdonan a acerca dos abogado pa defende nan derechonan legal.

Den un carta dirigi na e mandatario, e abogadonan a informa Minister Otmar Oduber cu su persona no por dicidi pa ‘ontruim’ ningun kiosco, si e no tin un veredicto di hues.

Den e carta e abogadonan a mustra e Minister bon cla, cu nan clientenan a haya un contract di huur,  a base di un procedura normal cu a cana hopi aña prome cu eleccion di aña pasa y cu e pasonan  di Minister Otmar Oduber pa laga ‘ontruim’ esakinan  sin intervencion di Hues hasta ta penalmente castigabel.

Abogado Kock kende ta representa algun di e ciudadanonan intimida aki, a mustra den su carta cu “e forma di procede aki, ta un acto castigabel pa ley sin duda y cu su cliente lo entrega un keho criminal contra di e Minister y su gobierno na Ministerio Publico.”

 

Ta parce cu e sed di vengansa di e Minister di Infrastructura no tin fin y ta sigui cu su campaña di persigui tur hende cu no a sostene su persona y su partido den ultimo eleccion, trapando asina derecho di un ciudadano di su derecho sagrado pa vota pa e partido y politico cu e ta kere aden.

Un campaña di persecucion politico pio cu esun cu a tuma luga na aña 2001 ora cu partido MEP a haya mandato di pueblo pa goberna y a manda cerca di 400 persona cas y den e persecucion geel aki, e actual Minister Otmar Oduber tambe tabata victima di e persecucion aki.

Sostene pa partido AVP a hiba un lucha tenaz contra di e persecucion aki contra gobierno di MEP y el a biba esaki den carni propio pero awe ta mesun victima di persecucion di MEP, a uni su mes na e grupo di MEPista pa persigui ciudadanonan cu tin tur derecho di haya oportunidad pa huur un di e kiosconan aki cu gabinete di Mike Eman a laga ehecuta como su plan di desaroyo economico pa e pais.