Home Politics Prome Minister Evelyn Wever-Croes: OFICINA DI GOBIERNO NA SAN NICOLAS A...

Prome Minister Evelyn Wever-Croes: OFICINA DI GOBIERNO NA SAN NICOLAS A WORDO DEDICA NA SR. EDISON BRIESEN

SHARE

Gobierno di Aruba den presencia di Presidente di Parlamento sr. Ady Thijsen, Ministernan, Parlamentarionan y invitadonan, a inaugura e Oficina di Gobierno na San Nicolas.

E edificio a wordo dedica na sr. Edison Briesen. Sr. Briesen ta conoci pa su trayectoria den politica y den gobernacion como tambe pa su trabou pa San Nicolas. Un persona cu un curason grandi. Sr. Briesen su trayectoria den politica como politico, parlamentario, minister y como consehero ta imprecionante.

Den su discurso na e ocacion aki, Prome Minister sra. Evelyn Wever-Croes a sorprende sr. Briesen cu e decision di Gobierno aki:

“Edison Briesen ta un persona di curason humilde cu ora pensa pa pone e ser humano central automaticamente ta pensa riba Edison Briesen. Pa e motibo aki no tawatin ningun duda ora e decision aki a wordo tuma pa dedica e oficina aki na nomber di Edison Briesen.”

Cu nomber di Edison Briesen riba e edificio di Oficina di Gobierno na San Nicolas, Gobierno di Aruba y e pueblo di San Nicolas a expresa e gran aprecio na sr. Briesen.

Sr. Briesen a declara Ofinica di Gobierno Edison Briesen na San Nicolas inaugura na momento cu el a corta e sinta.

Prome Minister a termina su discurso deseando e team completo cu lo bay traha na e oficina aki hopi exito, sabiduria y iluminacion den e retonan grandi cu nan lo encontra den nan caminda. Sra. Terry Gumbs, sr. Rudy Richardson y srta. Amy Richards y un team dinamico lo tin e tarea pa pone e oficina aki funciona na bienestar di e comunidad di San Nicolas.