Home Entertainment Fundacion Telefon pa Hubentud Aruba coordinando Unicef Kinderrechten Filmfestival

Fundacion Telefon pa Hubentud Aruba coordinando Unicef Kinderrechten Filmfestival

SHARE

For di 1999 caba Fundacion Telefon pa Hubentud Aruba ta para pa e derecho di cada mucha aki na Aruba. Asina por corda por ehempel ariba ‘Esaki ta bo Derechonan’ cu ta un proyecto cu Fundacion Telefon pa Hubentud Aruba a presenta na aña 2001.
Fundacion Telefon pa Hubentud Aruba ta un organisacion cu ta traha cu otro organisacionnan local e internacional, pa salvaguardia e derechonan di nos muchanan. E aña aki no ta un excepcion. Fundacion Telefon pa Hubentud Aruba a ser acerca door di Unicef Hulanda pa ta coordinador di Unicef Kinderrechten Filmfestival Aruba.

E proyecto aki ya caba ta wordo organisa na e islanan Bonaire, Saba y Sint Eustatius. E aña aki Aruba Curacao y Sint Maarten tambe lo ta participando na e proyecto aki. E obhetivo di e proyecto ta pa e muchanan siña conoce nan derechonan y siña expresa esaki na un bon manera. Door di conoce nan derechonan, nan ta siña cu otro persona tambe tin derecho mescos cu nan.

Na Aruba tin 5 scol cu lo participa na e proyecto aki. Esakinan ta: Colegio Santa Famia, Colegio Santa Filomena, Mon Plaisir Basischool, Prinses Amalia Basisschool y Puis X School. E scolnan aki lo participa cu nan klasnan 4, 5 y 6.

E proyecto ta consisti di diferente parti. Primeramente e docentenan di e scolnan ariba menciona lo ricibi un training tocante e materia di derecho di mucha. Despues e alumnonan lo ricibi un les tocante e derechonan di mucha for di nan docentenan. Despues cu e muchanan ricibi e les tocante nan derechonan, nan lo hasi un pintura tocante un di e derechonan. Esaki por ta e derecho cu nan gusta mas, of e derecho cu pa nan ta mas importante of esun cu nan tin mas pregunta riba dje. Ora e pinturanan ta cla, un exposicion lo ser organisa na e scol. Durante e exposicion lo saca un ganador di cada klas, pa despues saca un ganador di cada scol. Un ‘filmcoach’ (CineAruba y Armando Goedgedrag) hunto cu e alumnonan di e klas di e pintura ganador lo traha un pelicula. E basis di e pelicula ta e pintura ganador. Ora cu e peliculanan di tur e cinco scolnan ta cla, un anochi di ‘première’ lo wordo organisa. Durante e anochi aki tur e muchanan di e klasnan cu a gana hunto cu nan mayornan lo ta presente. Tur e peliculanan lo wordo presenta y na final lo kies un pelicula ganador. E pelicula ganador aki hunto cu tur e alumnonan di e klas ganador lo participa na e ‘Unicef Kinderrechten Filmfestival’ regional na Curacao ariba 14 di april. Eynan nan lo competi cu e alumnonan di Curacao, Sint Maarten, Bonaire, Saba y Sint Eustatius. E pelicula di e pais cu gana lo representa su pais durante e International Film Festival Rotterdam 2018.

Pa medio di un proyecto asina Fundacion Telefon pa Hubentud Aruba hunto cu Unicef Hulanda lo sigi duna e muchanan di Aruba informacion tocante nan derechonan y salvaguardia esakinan.