Awo mester logra pa tur peso di ley baha riba dje
“Un pabien grandi pa nos Cuerpo Policial y muy en especial pa e team di recherche cu a traha incansabelmente riba e caso cruel cu a haya e nomber “Fist” relaciona cu e asesinato di e hoben Sarahi Sierra”, .miembro di fraccion di POR den Parlamento, Alan Howell ta expresa cu sentimentonan mixto di orguyo pa e logro y tristesa pa e dolor causa cu e echo cruel aki.
Diaranson, despues di un investigacion intesivo door di un team di recherchenan special y bou guia di Ministerio Publico cu cooperacion di e Insituto Forensico di Hulanda, un team special di recherchenan di San Nicolas a detene e monster cu ta wordo sospecha di ta involucra den e asesinato cruel cu a tuma lugar na november aña pasa.
Howell mirando e crueldad di e asesinato aki ta considera cu ta importante pa pueblo sostene e famianan di e defunto y Cuerpo Policial y asina pone presion riba e fiscal y hues cu lo atende e caso aki pa baha cu tur peso di ley riba e sospechoso aki. “Den caso cu e wordo declara culpable, ohala e no wak solo nunca mas. Sobra ban laga den man di Dios”, Alan Howell a declara.