Pa 5 luna Minister Bermudez no a haci nada cu e protocol firma
ORANJESTAD – Siman pasa Minister di Finanzas, Asuntonan Economico y Cultura a haya bishita di Presidente di SADA sr. Eduard Maduro caminda nan a bin entrega un carta di protesta pa motibo cu nan no a ricibi nan pago di locual a keda concorda den un protocol cu a keda firma cu ex minister Bermudez na juli 2017.
Segun e protocol nan lo mester a haya nan pago fin di januari 2018 pero nan no a ricibi esaki. Durante un conferencia di prensa e mandatario ta trece dilanti cu e siman aki dos miembro di oposicion lo publica un potret den prensa di un kashi den oficina di e minister caminda tin un map skirbi douane riba dje.
Segun e dos miembronan di AVP den e map aki lo tabata tin tur informacion pa e mandatario tocante e asunto di aduana. Minister Ruiz-Maduro ta trece dilanti cu den e reunion cu e tabata tin cu e presidente di SADA sr. Eduard Maduro, el a mustra e presidente e carta cu ta fecha 22 di januari 2018, caminda por mira claramente cu tin un stempel di “spoed”, mirando cu esaki ta un asunto cu e gobierno aki no a laga sinta.
E realidad ta cu Minister Bermudez a firma e protocol na juli 2017 pero no a manda esaki pa Departamento di Legislacion pa asina e landsbesluit, h.a.m., por wordo traha. Esaki mester pasa su proceso bay pa conseho na Raad van Advies. Segun e mandatario nos tur sa si bo ta entrega e peticion na 7 di november 2017, esaki nunca lo por keda cla pa 1 of 31 di januari siguiente, ya cu tin dianan di fiesta y e departamento aki tambe tin nan agenda di prioridad pa traha cu ne. Minister Bermudez a dega y a warda 5 luna pa manda e peticion pa Departamento di Legislacion y awor ta pretende cu e departamento ta core bay traha riba dje y keda cla di biaha.