SINTI E CAMBIO
Minister President a anuncia con a corta gasto den su presupuesto, mustrando e ehempel di e cambio den gobernacion. Cu esaki e ta demostra cu e ta bisa kico e ta bay haci, y e ta haci loke ela bisa.
A cuminsa cu baha gasto di personal cu 8 miyon florin. Esaki ta pasobra Mike Eman tabata tin entre 140 y 170 hende den servicio, y e Minister President actual tin hopi menos. Ta trata aki di gastonan di salario, di ‘werkgeversbijdragen’, y di tur clase di compensacion cu e gobierno anterior tabata paga su coordinadornan. Ademas di e salarionan extravagante. E gobierno actual ta tene su mes na salarionan usual den gobernacion.
El a sigui cu baha gasto di ‘voorlichting en promotie’, cu ta mas bien pa skirbi articulo, traha propaganda, etc. Gastonan cu gobierno anterior tabata uza companianan di mercadeo pa haci, pero e gobierno aki a dicidi cu no ta haci esey. E placa ta wordo inverti den BUVO, cu lo haya personal y material pa nan por ehecuta nan trabou. Total gasto baha riba e post aki ta 800.000 florin cu antes tabata bay pa un solo compania di mercadeo, awor lo bay bek den man di pueblo.
Tambe a kibra contract di lease di 3 auto. Ta trata aki di 3 pick-up cu Mike Eman a lease net prome cu eleccion, cu e Minister President a yega haya cu sticker di AVP riba nan. Mesora a tuma e decision di kibra e contractnan aki. Lamentablemente mester a paga un multa pa a kibra e contractnan, pero e gobierno actual no ta haci wega: no mester di asina tanto auto.
Ainda ta tratando na kibra un contract di huur cu un ex coordinador di Mike Eman, cu si logra, ta nifica 100 mil florin menos na gasto cu por bay na esnan menos afortuna. Lamentablemente Mike Eman a sera un contract di huur cu su propio coordinador pa un edificio cu ta para bashi, di cual gobierno no tin uzo p’e. Pero Mike Eman a elimina e articulo cu ta haci posibel pa kibra e contract y awor huristanan ta kibrando nan cabes pa cu esey, pasobra 100 mil florin ta hopi placa pa paga un ex coordinador pa huur cu ningun hende ta uza!
Cu esaki ta duna ehempel di medidanan cu minister ta tuma, cuminsando serca su mesun bureau. Esaki ta e ehempel cu ta wordo duna di hendenan cu ta bisa loke nan ta haci y haci loke nan ta bisa