Dia 20 di november 2017 e Gobierno Nobo di MEP POR y RED a tuma gobernacion. Esey ta dos luna y pico atras, y durante e dos lunanan aki ta varios ta e crisisnan cu nan mester a atende cu urgencia. Ultimo dianan tin hendenan cu ta birando impaciente pasobra nan kier wak cambio mas lihe, algo cu tur hende kier. Sinembargo mirando e crisis nan cu nos gobierno a encontra, no por ta otro.
Crisis traspaso di gobernacion
Debi na falta di traspaso debido, a tarda pa por a cuminsa goberna sin e infrastructura basico di computer, internet y telefon. Sabotahe na e sistemanan a pone cu gobernacion di Gabinete Wever-Croes a cuminsa cu hopi atraso. Integrantenan di gobierno anterior, incluyendo ex minister, a bay cu ekiponan cu ta pertenece na Gobierno. Keho penal a wordo entrega contra e ladronicia aki, y 3 persona a wordo deteni. E investigacion ainda ta andando.
Falta di un traspaso debido a percura tambe cu no tabata tin continuacion den gobernacion, y cu cada dia ainda nos ta wordo confronta cu sorpresanan di contratonan cera cu ta mara e gobierno nobo tambe. Ta trata di contractnan di hendenan cu ta gana masha hopi placa di gobierno, of contractnan di huur. Pa e ministernan nobo goberna ta spera sorpresa desagradabel tur dia, y despues atende cu retonan existente y cu retonan pa futuro.
Crisis financiero
E cifranan suministra pa Directie Financien a bisa cu situacion financiero ta mucho mas malo cu premira, loke ta mas tristo ta cu cifras uza pa gobierno anterior tabata fictisio. Recientemente CAFT a confirma esaki. E deficit adicional pa 2017 tabata 150 miyon florin, y pa 2018 275 miyon florin. Esaki debi cu gobierno anterior den preparacion di e dos presupuestonan aki a tene cuenta cu un crecemento economico mucho halto y fictisio. Y a sconde gastonan y a pone riba papel gastonan mas abou cu realidad. Ademas cu no a tene debido cuenta cu por ehempel e refineria lo no habri. Awor Algemene Rekenkamer Aruba, cu publicacion di e rapport “Bo Aruba” ta expone riesgonan adicional cu gobierno anterior a laga nos aden.
Crisis social
Gobierno anterior a neglisha cuido social di nos pais pa hopi tempo. A prefera di haci window dressing, pone klinker tur caminda, lubidando cu hende no por biba di klinker. Departamentonan social tabata avisa gobierno pa tene cuenta cu un explosion social. Sinembargo gobierno anterior no a pone atencion na esaki. Nos gobierno a drenta y a wordo confronta cu e bom social a rementa ora dos hobencito a muri a consecuencia di abuso domestico. Mas serio ta cu nos a wordo confronta cu tin por lo menos 100 famia mas cu ta den situacion similar. Nos gobierno mester a cambia tur prioridad, y pone esaki practicamente completo na e problematica social. E crisisplan social lo costa 32 miyon florin, un suma cu no a tene cuenta cu ne ora gobierno anterior a traha e presupuesto 2018, pero cu nos mester a hinca aden si.
Crisis cu Venezuela
Dia 5 di januari 2018 presidente Maduro a anuncia e medida di (e.o.) ciere di frontera entre Aruba y Venezuela pa trafico aereo y via lama, pa motibo cu segun presidente Maduro Aruba lo ta colabora cu contraband di koper. Segun presidente Maduro, nan a avisa Aruba y a pidi atencion di gobierno di Aruba ya desde 2016 caba, pero sin resultado.
Debi cu e gobierno anterior a neglisha e peticionnan di Venezuela, e situacion a escala. Nos gobierno mesora a tende cu esaki y a prohibi importacion di koper. Sinembargo e tension entre e dos paisnan a aumenta. Pasaheronan Arubiano a wordo teni rehen na Venezuela, y danki na dialogo, e problema aki a wordo soluciona den gran parti. E efectonan keto bay ta wordo sinti y Arubianonan ta wordo desconseha pa biaha pa bay Venezuela. Cu e medida aki Aruba mester a busca rutanan alternativo pa importa fruta y berdura, un procedura cu ainda ta andando. E medida ta en efecto ainda, y riba tereno diplomatico riba nivel di Reino ta purba na yega na un solucion pa esaki. Mirando e sanccionnan recien di Union Europeo contra 7 miembro di gobierno di Venezuela, no ta spera alivio den e situacion aki pronto.
Esakinan ta algun di e retonan mas grandi cu Gobierno nobo di MEP POR RED a haya nan mes confronta cu n’e, y cu mester a atende imediatamente. Aparte di esakinan e ministernan ta hopi ocupa pa fiha nan maneho y stipula den cuanto tempo lo cumpli cu e compromisonan haci durante di eleccion: pone e ser humano central y trece bek trankilidad y bienestar pa tur cuidadano.