Home Politics Parlamentario Endy Croes di MEP : Presidente di CAFT Sr. Raymond...

Parlamentario Endy Croes di MEP : Presidente di CAFT Sr. Raymond Gradus a reconfirma durante reunion cu Parlamento cu AVP a laga un “Desastro Financiero” atras

SHARE

Diabierna ultimo Parlamento a haya e oportunidad di reuni cu henter College di CAFT guia pa su Presidente Sr. Raymond Gradus. Di parti Parlamento tabata presente Fraccion di MEP den su totalidad, Fraccion POR completo y Lider di RED, Parlamentario Ricardo Croes, mientras cu pa AVP tabata tey Parlamentarionan Mervin Wyatt Ras, Marlon Sneek, Richard Arends mientras cu den laat a cana kibra Jennifer Reyes. Pues un asistencia pober di Parlamentarionan di AVP, kisas berguensa pa tende e berdad di e destruccion financiero cu nan a causa na e pais aki.

E berdad amargo
Pa straño cu e ta zona ningun Parlamentario di AVP a lansa ni un solo pregunta. Presidente Raymond Gradus tabata hopi zakelijk pero si hopi skerpi. Tur locual por a sigui den e Conferencia di Prensa di CAFT teni algun rato despues di e reunion cu Parlamento ta netamente e berdad. Di acuerdo cu Sr. Gradus e uitvoeringsrapportage di derde kwartaal a ilustra un deficit di 2.6% y realmente e deficit di acuerdo cu Ley di LAFT norm mester ta 0.5% den 2017. Su palabranan propio “ De uitvoeringsrapportage over het derde kwartaal liet een zorgwekkend beeld zien” (Lesa maneho AVP). Lamentablemente AVP no a preocupa cu e rapportage aki pa purba corigi nan maneho desde september te cu 17 november 2017 unda realmente nan a baha.

Debe di 87% di GDP
Sr. Raymond Gradus ta sigui splica cu “In December 2017 bleek dat het tekort voor 2017 in de laatste maanden verder is verslechterd en uitkomt op 3.1% GDP”. Esaki ta equivalente na 130 miyon cu Mike Eman y AVP a malgasta extra di locual nan tabatin autorisacion pa gasta. Tambe Sr. Gradus ta bisa hopi cla cu esaki ta nifica cu e debe nacional (de overheidsschuld) a sigui crece y ta alcansa 87% di GDP. Pues di cada florin cu drenta caha di gobierno, 87 cen ta comprometi pa paga debe y 13 cen ta keda pa gobierno por maniobra pa rond un pais. Mientras cu MEP a laga esaki na 2009 manehabel cu un debe nacional di 43% di GDP cual ta cumpli cu tur standard internacional. Esaki sin mas ta e “Desastro Financiero” cu CAFT ta referi na dje. Un maneho iresponsabel cual a destrui henter e nacion Aruba.

Prestamo di 570 miyon florin
Raymond Gradus ta continua splicando cu e prestamo TOTAL awor lo aumenta cu 130 miyon pa un SUMA TOTAL di 570 MIYON pa cu aña 2017. Corectamente pueblo, esaki ta e berdad SUNU cu AVP a hinca nos aden. Por mira e video na canal 22 mas cerca di bo of busk’e riba You Tube search CAFT Raymond Gradus y scucha Sr. Raymond Gradus bisa e suma aki den palabra propio, esta 570 MIYON pa cu aña 2017. Esaki ta condena tambe y alaves caba cu tur e mentiranan di Richard Arends, Marlon Sneek, Mike Eman y tur esnan cu a sinta hunga cu cifranan artificial engañando e pueblo aki ultimo 8 aña. Parlamentario Endy Croes ta puntra su mes si e ‘desgraciadonan’ di AVP por drumi trankil anochi despues di a masacra Aruba di e forma aki. Corda cu dicho maneho a percura pa problemanan social enorme, pobresa, muchanan ta bay school mainta sin come, miles di cas sin awa y sin coriente, atraco y ladronicia tur dia rond Aruba, schoolnan den deterioro, canchanan di deporte den mal estado y asina por keda menciona. Mi tin un dolor profundo na mi curason pa locual nos a ‘hereda’, pero no obstante e reto grandi aki, bou liderasgo di Evelyn Wever Croes nos tin e compromiso incondicional como ‘one team & one love’ pa saca Aruba dilanti den futuro cercano. Conciudadanonan, poco pasenshi y comprension, parlamentario Endy Croes ta termina bisando.