Diaranson 31 di januari parlamentarionan ta bay tin un reunion cu e comision di Infrastructura cu ta wordo presidi pa Alan Howell di POR.
Marisol Lopez-Tromp ta indica cu e reunion aki lo ta un presentacion di un grupo di trabou multidisciplinario pa loke ta e problematica di desperdicio.
Igualmente el a bisa cu lo bay wordo presenta na nan dentro di poco un rapport cu yama “Final Report Integrated Solid Waste Management Aruba”. E presentacion aki ta uno importante ya cu e tema aki di desperdicio ta biba den nos comunidad mirando e molester y consecuencianan cu maneho di desperdicio tin pa nos comunidad.
Lopez-Tromp ta bisa den mesun rosea cu e topico aki mester keda bon regla y esey sigur ta un prioridad di Gobierno actual.
Minister Otmar Oduber lo ta bayendo Parlamento tambe unda den un comision fiho el lo relata kico ta loke el a bin ta haci den e ultimo dos lunanan den gobernacion, mescos cu el lo duna un relato di kico ta loke el a haya ora el a tuma over e carteranan di Infrastructura y Medio Ambiente y kico lo ta e trabounan cu lo bay ta andando.