ORANJESTAD – Nos a drenta e siman di DIA DI BETICO 2018. Minister di Cultura hunto cu Comision Celebracion Dianan Nacional ta haci un invitacion na henter e pueblo di Aruba pa ban celebra DIA DI BETICO!
Bini uno Bini Tur, grandi y chikito, mayornan y muchanan, bini cu henter famia. Aruba bin celebra cu nos, e gran dia, “ Dia di Betico”. Un dia special caminda nos ta recorda, e fecha natalicio di un gran luchador, estadista Arubano nos Libertador, Gilberto François “Betico” Croes
Diahuebs 25 di januari, riba Plaza cu ta carga su nomber, pa 9’or di mainta lo tin e ceremonia Protocolar y pa 6’or di atardi lo sigui cu e Manifestacion Cultural cu presentacionnan di tanto musica y canto di diferente musico y artistanan Arubano. Lo bay tin tentnan cu un sin fin di tanto platonan di cuminda crioyo, sigur nos boca dushinan cu no por falta y tambe diferente artesania y otro cos nan mas cu ta mucho pa menciona.
Pa nos muchanan lo bay tin un skina cu Dino-Jump y tambe lo tin oportunidad pa pinta cara.
Pa bo keda cu un bunita recuerdo di e gran dia aki, lo bay tin un tent special caminda bo por saca potret, hunto cu bo famia y/o amistadnan.
Ademas Gobierno y Comision MNacional ta invita henter e pueblo di Aruba pa asisti y bishita tur e actividadnan cu lo bay tin den diferente barionan rond Aruba. Ban celebra Dia di Betico.
Pabien Aruba, y sinti bo orguyoso cu nos ta e unico pais den Reino Hulandes cu tin un dia special dedica na un gran estadista, nos heroë nacional, nos libertador Gilberto François “Betico” Croes.
E popular banda Delicious (DLS) lo cera e anochi aki den un ambiente grandi. Bini uno, bini tur, acepta esaki como un invitacion personal. Aruba, Un Felis Dia di Betico!