ORANJESTAD, Aruba – Benu Pharmacy a tene un charla pa publico na Botica Oduber, unda cu dr. John Kock a duna informacion riba cancer di cuero. E charla tabata bon bishita, di cual tur hende a duna feedback positivo.
Dr. Kock a splica cu tin diferente tipo di cancer di cuero y kico tur un hende mester haci pa proteha nan curpa. E interaccion entre e participantenan y dr. Kock tabata uno positivo, unda cu hopi pregunta a bin dilanti. Dr. Kock a pone enfasis riba e uzo di sunblock y otro proteccion contra solo pa asina tur hende por cuida nan cuero.
El a splica con hendenan por reconoce cancer di cuero desde trempan, pa asina tur hende por evita cu e cancer di cuero por bira maligno. Hopi hende a keda sorprendi di e informacionnan cu nan a ricibi y a keda masha contento di e oportunidad cu Benu Pharmacy a duna nan pa haya sa mas di cancer di cuero.
Algun punto di proteccion contra cancer di cuero tabata:
Pa evita tuma solo intencionalmente;
Bisti sombre cu rand hancho;
Bisti bril di solo;
Uza protector solar cu un factor di proteccion contra solo di ≥15.
Na final di e charla participantenan a ricibi un coupon di 20% di descuento cu nan por uza na momento di cumpra un producto. E participantenan a gradici Benu Pharmacy y dr. Kock pa tur informacion ricibi y p’e dedicacion pa splica kico ta cancer di cuero.