Prome Minister sra. Evelyn Wever-Croes den Conferencia di Prensa di Gobierno a elabora riba e reunion di ultimo diabierna entre e delegacionnan di Venezuela, Aruba, Corsow y representando Reino tabata presente e embahador di Reino. Un reunion cu a dura basta largo teniendo varios tema di interes comun cu a wordo trata.
Prome Minister a indica cu e resultado di e reunion largo aki ta cu hunto a yega na algun palabracion cu a wordo poni riba papel y cada delegacion a hiba esaki na nan pais pa wordo confirma. Una bes nan wordo confirma y firma, Venezuela lo lanta e medida manera a ser priminti.
Den palabracionnan haci tambe tin entre otro poni cu Aruba ta bay fortifica y intensiva control na momento di importa productonan. Y Venezuela tambe di nan banda lo bay fortifica y intensiva control na momento di exporta producto for di Venezuela.
“No ta asina cu ta nos so mester tuma accion. Gobierno di Aruba ta pidi Venezuela pa nan tambe tuma mas accion di nan banda pa evita cu e productonan aki, cual nan ta yama productonan estrategico wordo exporta”, e mandatario a laga sa.
Otro tema di palabracion cu Prome Minister a indica cu a wordo haci den e reunion aki ta riba e pasaheronan cu a keda pega na Venezuela catalogando esaki como algo inhusto cu nos hendenan mester a sufri pa e motibo aki y keda pega na aeropuertonan y a expresa cu nos kier cos bay bek na normalidad.
“Vice Presidente di Venezuela a duna nos su palabra cu esaki ya no lo bay ta e caso y el a sigura nos cu si surgi un of otro problema pa nos tuma contacto cu nan y nan lo yuda cu esaki. Pero Aruba no kier esaki mas. Loke nos kier ta bay bek na normalidad. Mientras tanto nos ta canando e caminda necesario pa haya e normalidad.”
Prome Minister Wever-Croes un biaha mas ta haci un yamada na Aruba henter, na nos hendenan cu ta gusta biaha pa Venezuela sea ta pa bishita of buska nan salud, pa tene cuenta cu e medida ta na vigor ainda. Pues si no mester bay Venezuela, pa no bay. Y si mester bay mes, buska un otro manera pa sali bek for di Venezuela y evita di keda pega eynan.