Home Politics Locual parlamentario Sneek no ta splica pueblo: Algemene Rekenkamer ta mustra cu...

Locual parlamentario Sneek no ta splica pueblo: Algemene Rekenkamer ta mustra cu Gobierno di AVP no a logra un finansa publico sostenibel na 2016

SHARE

Mas y mas pueblo mes por mira cu e parlamentarionan di AVP no tin ningun nocion di kico ta come y bebe di finansa publico y pio ainda cu nan no por lesa ni interpreta rapportnan emiti pa organonan oficial den forma corecto of deliberadamente e parlamentarionan aki kier sigui engaña henter un pueblo, keriendo cu e pueblo ainda ta bibando den e epoca di e shonnan Eman. Aki partido MEP ta referi na un comunicado emiti pa e parlamentario di cabe’i boto, esta Marlon Sneek kende recientemente a declara cu “Cuenta anual 2016 di Algemene Rekenkamer a confirma cu gobierno a cumpli cabalmente cu presupuesto”.

 

Entradanan incidental

Den su comunicado sr. Sneek un biaha mas a elogia e maneho financiero cu a ser hiba pa Gabinete Eman ya cu segun su persona e presupuesto 2016 a cumpli cabalmente cu e norma stipula cu a yega na 2% di deficit. Sinembargo den e mesun rosea e no ta splica pueblo con e gobierno di AVP a manipula pa yega na e supuesto deficit di 2% aki y tambe locual Algemene Rekenkamer a publica relaciona cu e maneho financiero deficiente di Gabinete Eman. Siguientemente partido MEP ta cita locual Rekenkamer a publica den su Cuenta Anual di 2016: “Algemene Rekenkamer ta conclui cu e deducionnan realisa den e gastonan operativo y e deficit financiero, den 2016 ainda NO tabata e resultado di un maneho structura di gastonan, pero cu mas bien ta debi na sucesonan incidental. Gobierno NO a logra ainda pa tuma suficiente pasonan pa por logra un finansa publico sostenibel. Medidanan structura pa maneha gastonan, cu mester forma e base pa por cumpli cu e norma di presupuesto, NO ta tuma ainda of NO ta implementa suficiente. Algemene Rekenkamer ta conclui cu gobierno ainda tin un caminda pa cana prome cu yega na un finansa publico sostenibel di e Pais”. Pueblo, mas claro no canta un gallo! Ta kico mas MEP por agrega na e conclusionnan aki di Algemene Rekenkamer?

 

Deficitnan operativo acumula

Partido MEP a trece parti di e rapport di Algemene Rekenkamer padilanti y p’asina desenmascara tur e mentiranan di sr. Sneek, caminda claramente un y tur por lesa con Algemene Rekenkamer ta describi cu ta entradanan incidental e gobierno di AVP a ricibi durante 2016 y p’asina por a cera e presupuesto di e aña ey. Alabes sr. Sneek no ta comprende net nada di e grafico publica den e rapport di Algemene Rekenkamer relaciona cu e deficitnan operativo acumula, caminda por mira cu esaki a aumenta den forma alarmante desde 2012 te cu 2016, esta bao di gobernacion di AVP.

Pues lo ta bon pa sr. Sneek stop di skirbi su disparatenan, cuminsa lesa, interpreta y comprende tur e rapportnan oficial y p’asina no sigui pone cara di nos parlamento na berguensa debi na un parlamentario cu no ta comprende net nada di finansa publico, cual ta e ader principal den desaroyo di un pais. Den un siguiente comunicado MEP lo bay amplia riba e mega desaster financiero cu a ser laga atras na 2017 door di Gabinete Eman.