Minister di Husticia, mr. Andin Bikker awe mainta a yama su prome conferencia di prensa pa aña 2018. E mandatario a anuncia varios punto importante di kico lo bay haci pa trece siguridad den pueblo Aruba. Pa Minister Bikker, un di e sucesonan lamentabel ta di e pareha aleman kendenan a ser agredi y cu e atracado a bay cu un tas cu varios pertenencia di e pareha. Ta trata aki di turista y gran parti di Aruba su economia ta depende di turismo. Los di e incidente lamentabel aki, por bisa danki na creador cu tabatin sucesonan hopi limita compara cu añanan anterior segun e mandatario.
Durante e conferencia a anuncia cu lo bay tuma pasonan urgente pa evita cu tipo di casonan asina tuma luga. Segun Minister Bikker, semper el a vocifera desde cu e tabata den parlamento, cu mester traha planifica pa mira cu e plan ta funciona of na caminda mester ahusta e plan specialmente di siguridad. Mas pronto cu ta posibel lo bay tin un sistema di surveillance pa medio di drones den area di Oranjestad y San Nicolas, den areanan di hot spot, den area di hotelnan grandi, terminalnan di barco y otro luganan cu ta sinti unda e surveillance pa medio di drones lo bay aumenta e siguridad. Lo bay pidi request pa proposal pa helicopter y si mira cu algo a pasa por actua diligentemente riba esaki.
Tambe Minister Bikker a anuncia cu lo bay introduci e sistema di golden tips. Cu e sistema aki ta bay haci un apelacion riba e poblacion cu ora nan tin tipnan valioso, por yuda aresta esunnan cu a agredi un persona den pueblo of nos bishitantenan. Esaki por yuda tambe ora persona a falta respet na nos leynan. Un otro punto cu e mandatario a menciona cu lo kier bin cu e programa cu tanto Merca como na Hulanda tin, cu ta opsporing verzocht, caminda atrobe ta haci apelacion y cu cooperacion di pueblo, cu ora incidentenan asina tuma luga por haya tipnan valioso. E parti aki ta pas tambe den e sistema di golden tips pa aresta e persona aki mas pronto cu ta posibel segun Minister Bikker.